Ankara, Naitung:
Ka seng kaba synshar ha Turkey ka la wanrah ïa ka aiñ rew ne bill ha ka ïingdorbar ha ka Sngi Palei kaba thmu ban weng noh ïa ki million tylli ki ksew surok kiba ju don ha ki surok bad ki lynti- syngkien hynrei ki bym shym don trai ne nongri. Kane ka aiñ ka la wanrah ia ka jingpyrshah na ki ‘riew ieid mrad kiba ong ba ka pynduh jait ïa ki ksew surok kan long ka lad kaba kham bha ban ïa kaba khang kut bad set ïa ki hapoh ruh.
Namar katkum ki mat ba la buh hapoh jong katei ka aiñ rew kaba la wanrah bad tyrwa da ka seng AK, la ong ba yn buh da ki nongtrei ‘municipal’ ban rah ia kitei ki ksew surok na ki lynti- syngkien ba ki shong sakma bad yn pynrung ia ki hapoh ki jaka ri mrad lane ki jaka set ba shipor tad ba ynda don kiba wan kam trai lane kiba kwah ban ri ia ki.
Namar kitei ki nong-ialam jong ka seng AK, ki la ong ba ki surok bad ki lynti- synkien kim dei ki jaka shong ne jaka sah jong kitei ki ksew bad ki mrad ki bym don nongri bad kumta kan kham bha ban rah noh ia ki sha ki jaka ri mrad kiba kham bha bad kiba lah ban peit ia ki haba ki donkam ia ki dawai- dashin ne ki bam-ki dih.
Katkum ka jingpynbna kaba kham mynshuwa haba iadei bad katei ka bill, la ong ba ki bor pynïaid kin shu pyniap noh ia kitei ki ksew surok khnang ban pynduna ia ka jingbun ki ksew shong surok kiba long ruh ka jingma ia ki nongleit-nongwan khamtam ha ka por mynmiet. Hynrei namar ka jingpyrshah jong ki paidbah kiba ieid mrad bad kumjuh ruh na ka liang jong katto-katne ki nongialam saiñ pyrthei, la pynsangeh noh ia katei ka jingthmu ha katei ka por. Kumta, la ong ba ha kane ka por pat, kitei ki nongialam ki la wanrah bad tyrwa da katei ka bill ban shu rah bad kit noh ia kitei ki ksew surok sha ki jaka ri mrad kiba kham kyrpang bad kiba kham bha, khnang ban long ka jingiada ia ki paidbah nongleit-nongwan bad kumjuh ruh ia kitei ki ksew ki bym don trai.
