Shillong, Naitung 14
Ka Raid Laban Sports Social and Cultural Club da ka jingkyrshan lang u MLA ka South Shillong, u Bah Sanbor Shullai ka la pynkup burom ïa 6 ngut ki khynnah kiba don jingduna ha ki dkhot met bad kiba dei artad ki khynnah ba tbit ha ki jingïalehkai bad mihkhmat ïa ka Jylla bad ka ri bad kumjuh kiba la pass bha ha ka eksamin SSLC wat hapdeng ka jingbym biang ki dkhot met.
Kine ki khynnah ki dei na Fernando Speech and Hearing Centre, Umïam Ribhoi District, Bethany Society, Shillong, Jyoti Sroat School, Shillong bad na Lumparing Vidhyapeeth Secondary School, Shillong.
Ha kane ka jingpynkup burom ba kyrpang, na ka liang u Bah Sanbor Shullai kum u kongsan khlem da peit la kine ki khynnah ki dei na kano ka constituency, u la ai da ka tulop MLA kaba shibnai sha kitei ki khynnah, ha kaba u la pyntip ba ka tulop ka jong u MLA ka long 2 lak 3 hajar tyngka. Na kane ka tulop u la pynbna ban ai 1 lak tyngka sha ka Prisca Pyngrope na ka skul Bethany Society, ka ban leit mihkhmat ïa ka ri India ban ïashim bynta ha ka lympung World Arm Wrestling ka ban long ha Maldova, Europe.
Na ka bynta 4 ngut ki ban mihkhmat ïa ka Jylla ha ki jingïalehkai bapher bapher, u MLA u la ai jingïarap mar 20 hajar tyngka ban pynshlur bad kyrshan ïa ki ha ki kam ïalehkai bad kawei ka khusnam ba kyrpang kaba long 20 hajar tyngka ïa ka Ankita Das kaba la ïoh palat 89 persen ha ka risol SSLC wat hapdeng ka jingshitom jong ka met.
Kine kiba la ïoh jingïarap ki long ka Aisilda Thabah kaba na ka shnong Mawphansin, Nongstoiñ ha West Khasi Hills kaba dang pule Class VI, u Novenius Roiky Dkhar na ka shnong Madan Kynsaw ha West Khasi Hills uba pule class IX bad ka Syrpailin Wahlang na ka shnong Nongritong, Nongstoiñ ha West Khasi Hills kaba dang pule Class XI bad u Skhemlang Lyngdoh Nonglait uba na ka shnong Umlatar ha Ri-Bhoi District ba dang pule Class VI. Kine baroh ki dei ki khynnah pule jong ka Fernando Speech and Hearing Centre.
