Shillong, Naitung 14
Baroh lai tylli ki skul na Ri-Bhoi ki la jop ïa ka nam lahduh jong ka lympung State Level Subroto Cup 2024 Football kaba la long ha ka Sngi Saitjaiñ bad kane ka pyni ïa ka jingkhlaiñ jong ki ha madan ïalehkai.
Ka Nongjri Presbyterian Secondary School ka la rah ïa ka nam lahduh ha ka kyrdan U-15 Boys, ka Christian Higher Secondary School ka la rah ïa ka nam lahduh ha ka kyrdan U-17 Girls bad ka Myngken Christian Higher Secondary School ka la rah ïa ka nam lahduh ha ka kyrdan U-17 Boys.
Haba phai sha ka jingïalehkai final, ka Nongjri Presbyterian ka la lah ban pynliem noh ïa ka Government Boys Higher Secondary School (Tura) na West Garo Hills da 4-1 kol ha ka jingïalehkai kaba nyngkong kaba la long ha madan First Ground, Polo. Ha kane ka jingïalehkai, dei ka skul na Tura kaba la ïoh thep kol nyngkong lyngba u Thang Guo Lun Vaiphei tang ha ka minit kaba nyngkong. Kane kam shym la pynduh mynsiem ïa ka liang pyrshah bad tang ha ka minit ba 11, ka Nongjri ka la ïoh ban pynphai shi kol lyngba u Dabetskhem Rympei bad ha ka minit 13 u Chanjip Chetri u la thep ïa ka kol ba-ar, bad u Prosperwell Ryntong u la thep ïa ka kol balai bad ba saw ha ka minit ba 18 bad 47.
Haba phai pat sha ka jingïalehkai U-17 Girls final, ka Christian HSS ka la lah ban pynliem noh da 4-0 kol ïa ka Kyrshai Government LP & UP School na West Khasi Hills. ïa kine saw tylli ki kol la thep da ka Darika Rani ha ka minit ba 5, ka Rimika Khongkai ha ka minit ba 20 bad 51 bad ka Pynibha Rangthaluh ha ka minit ba 25.
Ha ka final kaba khatduh jong kane ka sngi, ka Myngken Christian ka la pynliem noh ïa ka North Liberty Higher Secondary School na West Jaiñtia Hills da 3-1 kol. ïa kine ki kol la thep da u Mebankhraw Nongrum ha ka minit ba 21 bad u Banganson Nongpalang ha ka minit ba 42 bad 65 bad ïa ka shi kol jong ka North Liberty la thep da u Jimal Rasmeet ha ka minit ba 56.
Ha kane ka sngi, nalor ki khusnam lahduh, la sam ruh ïa ki khusnam shimet, ha kaba ïa ka nam Best Goalkeepers kata ha ka U-15 Boys la ïoh da u Thrisilbirth A Sangma jong ka Tura Govt Boys HSS, ha ka U-17 Girls la ïoh da ka Ibashongkun Shylla na ka Christian HSS bad u Wanpli Malang jong ka Myngken Christian HSS ha ka U-17 Boys.
Ïa ka nam ‘Best Players’ jong ka lympung, kata ha ka U-15 Boys la ïoh da u Prosperwell Ryntong jong ka Nongjri Presbyterian SS, ha ka U-17 Girls la ïoh da ka Daiamon Marboh jong ka Christian HSS bad ha ka U-17 Boys la ïoh da u Banplibok Khongjoh jong ka Myngken Christian HSS.
Ha kane ka sngi pynhap pyrda ïa kane ka lympung la ïadon lang ka Secretary jong ka tnat Sports & Youth Affairs Kong Isawanda Laloo, Director jong ka Sports & Youth Affairs DD Shira, u Working President ka Meghalaya State Olympic Association Bah John F Kharshiing, President ka Meghalaya Football Association Bah Hamletson Dohling bad u General Secretary ka Shillong Sports Associa-tion Bah Dipshon L Nongbri nalor kiwei kiwei.
