Mumbai, Naitung:
Ha kaba ïadei bad ka jingphai khmat da kaba ïakren halor ka jingdon jong ka jingthep vote, ki la don lai ngut napdeng 37 ngut ki MLA jong ka seng Congress ha Maharashtra kiba la pep ban leit ïashim bynta ha ka jingïalang ba la khot pynlong da ka seng shwa ban pynlong ïa ka ilekshon Legislative Council Polls ha ka Sngi Thohdieng.
Ki MLA ki bym shym la don ha kane jingïalang ki long u Zeeshan Siddique, Jitesh Antapurkar bad u Sanjay Jagtap. U Antapurkar u la ïajan bha bad u Myntri Rangbah barim ka jylla u Ashok Chavan, uba la kyntiap sha ka seng BJP dang ha kine ki khyndiat bnai ba la leit, katba u kpa jong u Zeeshan, u Baba Siddique, u la ïasoh bad ka seng NCP, kaba hapoh ka jingïalam jong u Ajit Pawar, ha shwa ka ilekshon Lok Sabbha.
U Sanjay Jagtap um shym la don bynta lang ha ka jingïalang namar ba u don ha ka ‘wari’ (ka jingleit ïaid riewblei kaba ju long man la u snem) bad ha ka jingleit jong u sha ka jaka mane blei jong ka Pandharpur. Ka seng ka la ïathuh ba u Jagtap u la pyntip sha ki nongïalam shaphang kane ka jingjah jong u.
Ha kaba ïadei bad kane ka Sulabha Khodke, ha kaba u kurim jong ka u long u paralok ba ïajan jong u Ajit Pawar, bad u Hiraman Khoskar, la ong ba ki la don ka jingïadei ba ïajan bad ka seng NCP, ha kaba ki la leit ban ïashim bynta ha ka jingïalang.U heh nongïalam jong ka seng u Nitin Raut, ha ka jingïakren bad ki nongthoh khubor u la ong ba ka seng jong u ka don ha ka bynta kaba suk bad lah ban treikam.
“Dei ka kynhun kaba bat ïa ka jingsynshar kaba don ka jingtieng ha kaba kane ka dei ka daw ba ki la rah da ka bor ïa ki MLA, kaei kaei kaba ngim ju leh,” u la ong. Ïa ka ilekshon shiteng samoi sha ki 11 tylli ki Council la pynlong ha Vidhan Bhavan Complex. Man uwei pa uwei u kyrtong uba jop un donkam ïa ka bhah jong ki 23 tylli ki vote kiba la jied nyngkong.
Ka Congress ka la pynïakhun ïa uwei u kyrtong u “Pradnya Satav” bad ïa ki vote kiba tam jong ka yn sa sam sha kiwei pat ki arngut ki kyrtong kiba la ïoh jingkyrshan na ka kynhun Maha Vikas Aghadi. U nongïalam ka liang pyrshah ha Legislative Assembly u Vijay Wadettiwar u la ther tyngeh halor ki kaiphot ba la pynmih da ki nongthoh khubor kaba la ong ba ka la mih ka jingthep vote ba mar kylliang ha ki kyrdan jong ka seng Congress.
“Baroh ki MLA jong ngi ki don ha la ki jong ki ïing, ym kum ki MLA jong ka kynhun synrop kaba bat ïa ka jingsynshar. Hynnin ka miet ki la don 35 ngut ki MLA kiba la ïashim bynta ha ka jingïalang,” u la ong. Baroh arngut ki MLA kin don ryngkat bad ka seng Congress, u la bynrap shuh shuh. “Ngi la ïoh ban ïakren bad u Antapurkar bad u Zeeshan. U Antapurkar um shym don bynta lang ha ka jingïalang na ka daw jong ka jingbym ïasngewthuh jingmut jong u lem bad u kpa naba ki la ïajan bha bad u Ashok Chavan,” la ong u Wadettiwar.
Ki 288 ngut ki dkhot hapoh ka ïing dorbar ki dei ki para nongjiedlang na ka bynta ka ilekshon bad kumba ka long mynta ka la don ïa kumba 274 ngut ki dkhot. Ka BJP ka dei ka seng saiñ pyrthei kaba heh tam hapoh ïing dorbar ha kaba ka la don ïa kumba 103 ngut ki dkhot, ha kaba la bud sa ka seng Shiv Sena da 38 ngut, ka seng NCP da 42 ngut, ka seng Congress da 37 ngut, ka seng Shiv Sena (UBT) da 15 ngut bad ka seng NCP (SP) da 10 ngut. Ka BJP ka la pynïakhun ïa 5 ngut ki kyrtong bad ka seng Shiv Sena kaba ka la ïatreilang ka la pynïakhun ïa arngut ki kyrtong. Ka NCP ka la pynïakhun ïa arngut ki kyrtong. Ka Shiv Sena (UBT) ka la pynïakhun ïa uwei u kyrtong, katba ka NCP (SP) ka la ai jingkyrshan ïa u kyrtong jong ka PWP.
