Nongstoiñ, Naitung 14
Wat la ka dei ka khynnah ka bym lah ban ïohsngew bad bym nangkren pynban ka la wanrah nam bad burom ïa ka dong, ka thaiñ bad ïa ka Jylla hi baroh kawei ha ka ïakhun-kti kaba la tip kum ka Arms Wrestling.
Kane ka dei ka samla Aisilda Thabah, 15 snem ka rta kaba dei ka khun jong u Bah Phangstar Nongsiej bad ka Kong Colita na Mawphansien, kiba shong basah ha ka shnong Pyndengrei, Nongstoiñ kaba ha West Khasi Hills District.
Lah ban ka dew hangne ba ka Aisilda ka la rah ïa ka nam jop ha ka jingïakhun kaba la pynlong ha nongbah Nagpur jong ka jylla Maharashtra kaba la tip kum ka National Arm Wrestling & Para Arms Wrestling Championship 2024 kaba la sdang naduh ka 6 haduh 10 tarik Jylliew 2024. Ka la ïoh ban poi sha ka kyrdan ba ar ha baroh arliang jingïakhun kti bad pynlong ïa ka Meghalaya Arm Wrestling Association (MAWA) ban jied ïa katei ka khynnah ban mihkhmat sha ka lympung kaba la tip kum ka “World Arm Wrestling Championship 2024” ka ban sdang ha u bnai Nailar 2024 ban pynlong ha Dewbah Europe ha ka Ri Maldova.
Na ka liang ki bahaïing, ka samla Aisilda ki la pynpaw ba ka shem jingeh shibun ïa ka ïing ba kin phah ïa la ka khun sha katei ka lympung baheh namar ka bai-leit bai-wan kan kot sha ki 2 lak tyngka shiteng eiei. Kumta ki la kyrpad ïa ki paidbah ba kin noh synñiang lem lyngba u Gpay No. 9362834190 namar kim dei na ka ïing kaba biang ha ka ïoh ka kot.
U Bah Aibanlumlang Marngar, President ka West Khasi Hills Arms Wrestling Association (WKHAWA) u la ong ba ka Synjuk kam kotbor ban pynlut na ka bynta ka Aisilda, kumta ka kyrpad ïa ki bor ki bahalor bad ki paidbah ba kin kyrshan lem.
