Shillong, Naitung 14
Kin nym don satia ki club na Meghalaya ban ïashim bynta ha ka samoi ïalehkai jong u snem 2024-25 ka lympung I-League 3 jong ka All India Football Federation.
La dep ban pynbna ïa ki ar phew tylli ki kynhun ïalehkai, ban ïashim bynta ha kane ka aiom ba mynta ha ka lympung I-League 3, ka ban dei ruh kaba ar ban pynlong ha ka Ri.
Ki club ki ban ïashim bynta kiba bun kin dei beit ki lahduh ne Champions ha ki State League jong ki jylla, ïa kiba la jied hi da ka State Association ki jong ki.
Ka club ba khatduh ba la ïashim bynta ka dei ka Rangdajied United Football Club kaba la shah jied kum ka lahduh jong ka Meghalaya State League 2023. Wat la ka la ïoh mihkhmat hynrei kam shym la lah ban ïaid palat na ka group hadien ba ka la pyndep ha ka kyrdan ba ar ha ka Group C.
Hynrei mynta u snem, haba ym pat lah ban pynlong ïa ka Meghalaya State League, kaba mut ka tarik ba khatduh na ka bynta ban ïoh rung ka la dep ïaid, ha kaba ka Meghalaya kam shym la lah ban phah ïa ka club ka ban mihkhmat.
Nalor ki lahduh jong ki Jylla, ha kane ka aiom ba mynta ha ka I-League 3 la kynthup ruh ïa ki club kata ka Maharashtra Oranje FC bad ka Kenkre FC, kiba la shah pynhiar kyrdan na ka I-League 2 ha ka aiom u snem 2023-24, katba ka KLASA bad ka Kerala United FC ki la ïoh rung lyngba ka playoffs.
Ki club ban ïakhun ha ka I-League 2024-25 ki long ka KLASA FC (Manipur), Kerala United FC (Kerala), Karbi Anglong Morning Star FC (Assam), Garhwal FC (Delhi), Charutar Vidya Mandal FC (Gujarat), Sesa Football Academy (Goa), Bhuna FC (Haryana), Diamond Harbour (West Bengal), HAL SC (Karnataka), Sports Academy Tirur (Kerala), Lake City FC (Madhya Pradesh), Chanmari FC (Mizoram), Sports Odisha (Odisha), Young FC (Punjab), Jaipur Elite FC (Rajasthan), Ghaziabad City FC (Uttar Pradesh), MYJ-GMSC (Maharashtra), RKM Football Academy (Chhattisgarh), Maharashtra Oranje FC (Maharashtra) bad ka Kenkre FC (Maharashtra).
