Shillong, Naitung 15
Ka Shillong Lajong FC ka la shah pynngat ha ka Group-F jong ka 133rd Durand Cup 2024, hadien ba la pyllait paidbah ïa ka jingpynïakap (draw) na bynta 24 tylli ki kynhun ïalehkai ki ban ïashim bynta ha kane ka lympung.
Kane ka kynhun ïalehkai I-League na kane ka nongbah, ka la shah kynthup lang ryngkat ar tylli ki kynhun ïalehkai jong ka Indian Super League kata ka FC Goa bad ka Hyderabad FC ha ryngkat ka Tribhuvan Army FC kaba na Nepal.
Ïa kane ka jingïakhun jong ki kynhun kiba don ha ka Group-F yn pynlong ha Jawaharlal Nehru Stadium ha Polo, Shillong, ha kaba ka Lajong kan ïakhun nyng-kong pyrshah ïa ka Tribhuvan Army ha ka 2 tarik u Nailar.
Kumba ka paw ka Shillong bad ka Jamshedpur ki dei ki ar tylli ki nongbah ki ban pynlong ha ka sien kaba nyngkong eh ïa kane ka lympung ïalehkai kaba la rim tam hapoh ka dewbah Asia. Ka Kokrajhar na Assam ka la ïoh ban pynlong ar snem kynthih, katba ka Kolkata kan dang bteng ban long ka jaka pynlong ïa kane ka lympung ïalehkai, ka ban kut ha ka 31 tarik u Nailar. Kane ka lympung ïalehkai kan sdang ha ka 27 tarik mynta u bnai, watla ka jingïakhun ba nyngkong jong ka Shillong kan long ha ka 2 tarik Nailar.
Ha kane ka sien kaba 133 kin don haduh 24 tylli ki kynhun kiba na ka lympung ISL, I-League, na ki kynhun shipai bad kumjuh ruh ar tylli ki kynhun ïalehkai na ki ri ba marjan kata na Bangla-desh bad Nepal.
Ka Lajong, kaba kawei na ki klob jong ka I-League kaba la ïashim bynta ha u snem ba la lah, hynrei ka la shah rem noh tang ha ka jingïalehkai group da kaba shah rem ar sien bad jop shisien.
Ïa ka JN Stadium la pynlong biang da ka madan phlang tynrai (natural grass) hadien kumba shiphew snem eiei ba la siang da u phlang plastik (artificial turf). Lyngba kane ka jingmaramot thymmai la pynbun ïa ki jaka shong, ki kamra khreh jong ki nongïalehkai, ki floodlight thymmai bad ki jingpynbha ïa ka jingitynnad ba shapoh.
Ka jingtrei ka la dep haduh 95%, la ong u Commissioner bad Secretary ka tnad Sports & Youth Affairs u Vijay Kumar D ha ki nongthoh khubor ha ka sngi Palei hadien ba la wai ka jingïalang bishar bniah. Ïa ki tiket la sdang ban die naduh ka Sngi Thohdieng ha ka dor hapdeng T.100 haduh T.500.
Ka kam ka la ïaid baroh shi sngi ban pynkhreh ïa katei ka madan, hynrei ka la shah khanglad ar sngi haba ka kynhun sengbhalang ka la pynlong ka jingbishar bniah ïa ki nongbylla kiba la wanrah nabar jylla.
Kane ka lympung ïalehkai kan bud ïa ka rukom ïalehkai ’round-robin league’ bad ka quarter & semi final’, katba ïa ka final yn pynlong ha Salt Lake Stadium, Kolkata. Haba kheiñ kyllum, yn pynlong haduh 43 tylli ki jingïalehkai bad ki kynhun ki ban wan ha ki kyrdan ba hakhlieh na kawei pa kawei ka group, ryngkat ki ar tylli ki kynhun kiba kynsai ki ban wan ha ka kyrdan kaba ar, kin kiew sha ka quarter final.
Lah ban pynkynmaw ba ka lahduh jong u snem ba la lah, ka Mohun Bagan Super Giant ka la shah pynngat ha ka Group-A kaba kynthup lang ia ka East Bengal FC nalor kiwei pat ki kynhun.
