Shillong, Naitung 15
Ka Spain ka la thaw ïa ka rekod da kaba rah ïa ka nam lahduh kaba saw ha ka European Championship. Kane ka wan urlong hadien ba pynliem ïa ka England da 2-1 kol bad lyngba ka kol khatduh ba la thep da u Mikel Oyarzabal.
Kane ka kol ba la thep u Oyarzabal ka la wan hadien ka jingïarap pynbuh bol da u Marc Cucurella bad ban pynlong ïa ka Spain ban jop syndon.
Kane ka kynhun ïalehkai hapoh ka jingïalang u Luis de la Fuente kaba la bteng ïa ka jingjop kaba hynñiew ha kane ka lympung, ka la rah teng ïa ka nam lahduh ha u snem 1964, 2008 bad 2012. Wat la ka England ka la rung final ar sien lynter, hynrei kam shym la lah ban pynurlong ban kynjoh sha ka thong.
Kumba ka paw ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Ka Spain ka la ïoh kham bun ki kabu ksiar, hynrei kam shym la lah ban pynurlong bad haba kaba kut jong ka kylla step kine ki kynhun kim shym la lah ban thep kol.
Hadien ar minit ba la bteng ïa ka jingïakhun jong ka kylla miet, dei ka Spain kaba la ïoh pynkhih jar nyngkong eh lyngba u Nico Williams bad ïa kane la ïarap pynbuh bol da u rangïalehkai ba dang 17 snem ka rta u Lamine Yamal, uba khur artad ïa ka nam young player ha kane ka lympung.
Hadien katto katne por ka England ka la lah ban pyniakhaid kylla lyngba u Cole Palmer ha ka minit kaba 73. Kane ka jinglah ban pyniakhaid ka la pynlong ia ka jingiakhun ba nangkham itynnad shuh shuh ha kaba baroh ar ki kynhun ki la iai bteng ban iakhun tyngeh. Watla kine ki kynhun ki la ioh ia ki kabu kiba biang, hynrei kim shym la lah ban thep.
Hashwa ban wai ka Spain ka la ïoh ban thep ïa ka kol kaba ar bad kaba khatduh lyngba u Oyarzabal ha ka mint kaba 85 bad ban khur syndon ïa ka jingjop.
