Jowai, Naitung 16
Ka Mookymphad Mihmyntdu bad ka Myrjai ki la khur ïa ka jingjop, katba ka Pasyih Cultural bad Lumpyrtuh Mihmyntdu, ka Mookaswan Dongwah bad Catholic Youth Mihmyntdu ki la ïasam mar shi point ha ka 4th U Adelbert Laloo Memorial Trophy-3rd Division Football Tournament.
Ïa kane ka lympung ïalehkai la pynïaid da ka West Jaiñtia District Sports Association (WJDSA), la pynlong ha madan Kiang Nangbah Stadium, Jowai.
Ha ka jingïakhun kaba nyngkong kaba la long ha ka sngi Ba-ar, ka Mookymphad Mihmyntdu ka la pynliem ïa ka Lumsliarsliar da 2-0 kol. Ïa kine ki kol jong ka Mookymphad Mihmyntdu la thep da u Walad Shylla ha ka minit kaba 3 bad u Pynïohlad Papeng ha ka minit kaba 37.
Ha ka jingïalehkai kaba bud ka Myrjai ka la pynliem ïa ka Dongnein Mookaswan lyngba ka shi kol ba la thep da u Lamphrang Kyndait ha ka minit kaba 68.
Katba ka jingïalehkai hapdeng ka Pasyih Cultural pyrshah ïa ka Lumpyrtuh Mihmyntdu ka la kut ha ka jingïakhaid kaba mar 1-1 kol. Ka Pasyih Cultural ka la pynkhih jar nyngkong lyngba u D. Rymbai ha ka minit kaba 36, hynrei ka Lumpyrtuh Mihmyntdu ka la lah ban pynïakhaid kylla lyngba u A. Rymbai ha ka minit kaba 46.
Ha ka jingïalehkai kaba khatduh jong kane ka sngi hapdeng ka Mookaswan Dongwah pyrshah ïa ka Catholic Youth Mihmyntdu ki la ïakhaid hadien ba kim shym la lah ban pynkhih jar haduh kaba kut ka jingïalehkai.
