Nongpoh, Naitung 16
U District Sports Officer (DSO) ka Ri Bhoi District u Bah Bobby L Nongbet u la pynpaw ïa ka jing-sngewkmen kaba khraw halor ka jinglah jong ki lai tylli ki skul na ka district ban khur jingjop ha ka lympung State Level Subroto Cup 2024 bad ïoh ïa ka lad ban mihkhmat ïa ka Jylla sha ka International Subroto Cup 2024 kaba yn sa pynlong shen ha ka nongbah New Delhi bad Bangalore.
Kum ban shu kdew, kitei ki lai tylli ki skul kiba la ïoh ban mih-khmat ïa ka Jylla sha katei ka lympung, ki kynthup ïa ka Mynken Higher Secondary School, Bhoirym -bong ha ka kyrdan U-17 ki shynrang, ka Christian Higher Secondary School, Nongpoh ha ka kyrdan U-17 ki kynthei bad ka Nongjri Presbyterian Secondary School, Nongjri ha ka kyrdan U-15 jong ki shynrang.
U Bah Nongbet u la ïathuh ruh ba kane ka dei ka sien kaba nyngkong ba baroh lai tylli ki skul na Ri Bhoi ki la ïoh ïa kane ka lad hadien ki skul kiba la rah teng na East Khasi Hills District.
U Bah Nongbet u la ïathuh ruh ba ka jingpynkhreh bad pynbit pynbiang ïa ka leit ka wan jong kitei ki kynhun ka dangïaid shakhmat khamtam ha ka liang jong ki kynthei U-17 ka ban sdang noh naduh ka 5 tarik jong u Nailur. U la ïathuh ba ka jingïalehkai jong ki shynrang ha ka kyrdan U-15 kan sdang naduh ka 28 tarik jong u Nailar, katba ha ka kyrdan U-17 jong ki shynrang pat kan sdang naduh ka 11 tarik jong u Nailur mynta u snem.
U Bah Nongbet u la ïathuh ruh ba ha katei ka lympung International Subroto Cup 2024 ka ban sa long ha ka nongbah Delhi bad Bangalore, yn wan ruh ban shim bynta da ki skul na kiwei pat ki ri ba kynthup na Indonesia, Sri Lanka, Bangladesh, Bhutan bad Nepal bad ai ruh ka jingkitbok kitrwiang sha baroh lai tylli ki skul ka district kiba mihkhmat ïa ka jylla ba kin ïoh ïa ka jingjop kaba don burom ha katei ka lympung.
Kumba ka Ri Bhoi District, kam don satia ïa ka madan ïalehkai kaba paka kum ba don ha ka nongbah Shillong, hynrei ka jinglah pat jong kine ki lai tylli ki skul ban jop ha ka State Level wat hapdeng ka jingbym biang jong ki madan ïalehkai, kan pynlong pat ïa ka sorkar ba kan shim khia kham kloi ïa kane bynta da kaba ong ba ka por ka lah dei ba ka Ri Bhoi District kan ïoh noh ïa ki jong ki madan ïalehkai kiba paka bad kane kan kyntiew shibun ïa ka sap ka phong jong ki samla ïalehkai jong ka district.
