Espinasse-Vozelle, Naitung:
Katkum ki khubor, la iathuh ba 4 ngut ki briew, kynthup ia u nongsiat, ki la khlad noh ha ka janmiet jong ka sngi Saitjain, hadien ba uwei u runar u la synreit kuli naphang hapdeng ka jingialeh kmen ha ka iingkhawai sngikha ha France.
La ong ba utei u rangbah u la leit sha katei ka ïing kaba don marjan bad ka iingsah jong u, ha kaba uwei u samla uba dang 20 snem ka rta u dang rakhe ïa katei ka sngi kha jong u ha ryngkat bad ki bahaiing- hasem jong u hapoh Espinasse-Vozelle, ka shnong pdeng jong ka ri France kaba don kumba 1000 ngut ki nongshong shnong bad kumba 60 Kilometre lane 37 mile) shaphang shathie jong ka Clermont-Ferrand.
Ha katei ka jingjia, la ong ba utei u brie wu la synreit kuli naphang sha ki nongwan kiba don ha katei ka jaka leh kmen, ha kaba 3 ngut ki la duh ei noh ia ka jingim ha katei ka por bad ha kaba khatduh la ong ba utei u briew u la siat iap lang noh syndon ia lade.
Kaba sngewsih pat ka long ba utei u khynnah uba rakhe ia ka sngi ba kyrpang jong u ruh, u la khlad lang noh ha ryngkat bad u kpa jong u hi, ha katei ka jingshah synreit kuli ha utei u rangbah uba sah marjan.
Kumta, la ong ba ki pulit bad ki bor pynïaid ki dang tohkit bad wad bniah ia ka daw ba kumno bad balei katei ka jingjia la leit jia ha katei ka sngi.
Ki pulit ki la ioh jingtip ba utei u briew uba leit synreit kuli ha katei ka jaka, umdei u nongleit sha katei ka jaka lehkmen hynrei u la shu leit khnang ban tang ban ioh pyndep ia katei ka jingthmu thombor jong u ha katei ka iing.
Nalor jong kitei kiba khlad, sa kiwei pat ki 4 ngut ki la mynsaw na katei ka jingjia bad ki dang don hapdeng ka jingsumar, ha kaba ki doctor ki la pyntip ba kitei ki 4 ngut ki la lait na ki jingma kiba khraw.
La ong ba ki don sa shiphew ngut kiwei pat kiba sakhi ia katei ka jingjia, bad kiba dang shah bat naka bynta ki jingtohkit kiba bniah ban lap ia ka sdang ka kut jong kaei kaba la jia baroh ha katei ka sngi.
