Guwahati, Naitung:
Kumba la khmih bniah, la ong ba ka jinglong jingman ha kaba ïadei bad ka jingshlei um ha ka jylla Assam ka la nang kham duna haba la khmih bniah ha ka Lah Sngi U Blei naba ka jingshlei um ka la nang hiar ha kiba bun ki jaka kiba hapoh ka jylla, la ïathuh ki bor ba dei khmih.
Ka India Meteorological Department’s Regional Meteorological Centre (RMC) ha Guwahati kumba ka long mynta kam shym phah shuh kino kino ki jingmaham lait noh tang ki jingpyntip bad jingïathuh lypa ban don ka jinghap slap ha ka them Barak bad ha ki katto katne ki distrik kiba don ha marpdeng jong ka Assam.
Ha kaba ïadei bad kane ka bynta, katkum ka jingkhmih bniah na ka kaiphot jong ka Assam State Disaster Management Authority (ASDMA) ha ka miet Sngi U Blei ka ïathuh ba la don uwei u briew uba la ïap ha Karimganj bad uwei ha Nilambazar Revenue Circle jong ka Karimganj distrik.
Da ka jingdon jong kine ki briew, baroh ki briew kiba la ïap na ki jingjia jong ka jingthombor ki bor ka mariang kynthup na ka jingshlei um, jingtwa khyndew, erïong bad jingpom pyrthat haduh mynta ka la kiew sha ka 109 ngut.
Ka kaiphot ka la ïathuh shuh shuh ba ki la don palat 5,97,600 ngut ki briew ki shah ktah jur na ka jingshlei um ha ki distrik kiba kynthup ha Cachar, Chirang, Darrang, Dhemaji, Dhubri, Dibrugarh, Goalpara, Golaghat, Jorhat, Kamrup, Kamrup Metropolitan, Karimganj, Majuli, Morigaon, Nagaon, Nalbari bad Sivasagar.
Kumba la sakhi, la ong ba ka Cachar ka la long kawei na ki distrik kaba la shah ktah jur na ka jingthombor ki bor ka mariang ha kaba ki la jan don 1.16 lak ngut ki briew ki shah ktah, ha kaba la bud sa ka Dhubri da 81,500 lak ngut bad ka Nagaon da palat 76,000 ngut ki briew kiba shah ktah jur na ka jingshlei um, la bynrap shuh shuh ka kaiphot.
