Mawkyrwat, Naitung 17
Ka KSU South West Khasi Hills District kum shi bynta ban pynneh pynsah ïa ka riti ka dustur jong u mynbarim, ha ka lyngkhuh sngi ïap ba 189 jong u Pa’iem Tirot Sing ka la pynlong ïa ka Rongbiria ïakop siatkhnam kaba u khasi hyndai u sngewtynnad bad byrngia ïa kane ka jingïalehkai.
Ïa kane ka Rongbiria la pynlong ha ka sngi Balang ha Bam Jngiem Tynrong, Mawlamngwir kaba ha South West Khasi Hills District ha kaba la wan ban ïashim bynta haduh kumba 24 tylli ki kynhun jong ka dong ka thaiñ Mawkyr-wat kumjuh ruh na Shillong.
Ha kane ka jingïakop, la rah da ka Shillong ‘A’, kaba wan ba-ar dei ka Hima Pamsanngut bad balai ka Shillong ‘C’. Katba ha ka jingïasiat ba para marwei la rah da u Bah K.H.Sohshang, ba-ar u Bah S. Ryngjah bad balai u Bah Nepaland Lyngkhoi.
Ha kane ka jingïakop, u samla Shalkitbok Kharbani, Asst. Education Secretary KSU seng kmie u la long u Kongsan bad u samla Kitboklang Syiemlieh, President barim ka KSU SWKHD kum u symbud kongsan ha ryngkat ka jingdonlang u samla Forwardman Nongrem, President KSU SWKHD, Bah Wallambok Syiemiong, Presidsnt ka SSSS, SWKHD, Bah Kenesjone Nonglait, President FKJGP SWKHD, samla Kyllang Thongi, President HNYF Southern Border Area, Bah Koland Lyngdoh, Secretary shnong Mawlangwir bad kiwei kiwei.
U Samla Shalkitbok Kharbani haba ai jingkren nyngkong eh u la ai khublei ïa ka KSU South West Khasi Hills District kaba la pynlong ïa kane ka lympung kum shi bynta ban pynkhie im pat ïa ka riti ka dustur jong u longshwa manshwa.
U la ong ruh ba haba phai dien ïa ka riti dustur u Khasi, ïa u shynrang la jer la thoh ïa ka kyrteng jong u ha ki lai tylli ki khnam, u khnam ba nyngkong ban ïada ïalade, khnam ba-ar ban ïada ïa ka ïing ka sem bad ka kur ka jait bad u khnam balai ban ïada ïa ka Ri bad Jaitbynriew.
Shuh shuh u la ong ruh ba ka jingpynlong ïa kum kine ki lympung kan long ka nuksa ïa kiwei pat ba kin bud bad ka long ruh ka jinghikai ïa ka pateng kaba mynta ba uno uno u shynrang Khasi u dei ban nang ban bat ïa u khnam bad ka ryntih kumba u Longshot manshaw u la hikai.
Ha kane ka sngi la ïoh ruh ban pynshit pynshngaiñ shuh shuh ïa kane ka progam da ki sur jingrwai na ki samla kynthei jong ka KSU Women Wing Mawkyrwat Circle.
