Shillong, Naitung 19
Ka Nongkohlew SC bad ka Mawkasiang SC ki la ïoh jingjop ha ka lympung ïalehkai SSA Under-20 Fourth Division 2024 ha ka Sngi Thohdieng ha kane ka nongbah.
Kane ka nam jop jong ka Nongkohlew ka la wan hadien ba ka pynliem noh ïa ka Raitsamthiah SC da 2-1 kol. Kane ka la wan lyngba u Shaiñ Mujai (27) bad u Pynshngaiñ Mujai (55), katba ka Riatsamthiah ka la pynphai kylla shi kol lyngba u Laymonky Nongsiej (37).
Ka Mawkasiang ka la pynliem noh ïa ka Pommura SC da 4-0 kol. U Westernroy Nongrum u la thep ar kol ha ka minit kaba 2 & 37, katba ïa kiwei pat la pynbud da u Letmingthang Kipgen (57) bad u Lalgouen Kipgen (68).
Ha kawei pat ka jingïakhun, ka Diengpasoh SC ka la ïasam mar shi point bad ka Lummawbah SC hadien ba ki la ïakhaid mar 1-1 kol. Ka Lummawbah ka la pynkhih jar nyngkong lyngba u Khrawnam Nongkhlaw ha ka minit kaba 6, hynrei ka Diengpasoh ka la pynïakhaid kylla lyngba u Shemphanglin Lyngkhoi (58).
Kane ka lympung kan bteng biang ha ka Sngi Saitjaiñ ha kaba ka Lumpyngngad SC kan ïakhun pyrshah ïa ka Mawreng SC ha ka por 11:30 mynstep, kumjuh ka Mawlynrei SC ïa ka Golflink SC ha ka por 1:45 mynsngi, ka Mawklot SC ïa ka Them Rangshken ACC ha ka por 4 baje jammiet bad kine baroh kin long ha madam MFA, katba ka Pynthorbah SC kan ïakhun pyrshah ïa ka Laitlulong SC (4PM) ha SSA Stadium, Polo.
