Shillong, Naitung 19
Ka tnat ïalehkai jong ka Sorkar Jylla ka la ai jingkyrshan mar T. 2 lak tam sha ar ngut ki nongmareh ba la rangbah bad san jong ka Jylla ki ban leit sha Australia na ka bynta ban mihkhmat ïa ka Ri India sha ka 13th Pan Pacific Master Games 2024 ka ban long ha u Risaw mynta u snem Gold Coast Queensland kaba ha Australia.
Kine ki long i Kong Kmoiñ Wahlang na Shimawlein kaba ha Mawkyrwat, South West Khasi Hills bad ka Kong Wandashisha Dewkhaid na Nongsder, Ri Bhoi District bad kaba dei shnong trai na Mawpen.
Ïa kane la pynpaw da u Director ka tnat ïalehkai u D.D Shira (MCS) ha ki lad pathai khubor ha ka Sngi Thohdieng da kaba ong, “Na ka liang ka tnat ka la ai jingkyrshan sha i Kong Kmoiñ Wahlang bad Wandashisha Dewkhaid mar T. 2 lak 20 hajar, bad kane ka long kat kum ka jingpan ka jong ki sha katei ka jingïakop mareh.”
“Na ka liang ka tnat ngi phah ka jingai jingai khublei ïa kine baroh ar ngut ki nongmareh ba kin lah ban ïalehkai bha ha katei ka jingïakop bad ruh ba kin ïoh kheit ïa u soh ka jingjop,” u la bynrap.
I Kong Kmoiñ iba la long iba la tymmen tam napoh ka Jylla ban ïashim bynta ha kiba bun ki jingïakop mareh la ka long hapoh ka Jylla ne wat ha kylleng jong ka ri. Lyngba ka jinglah ban ïalehkai bha ha kwei na ka jingïakop napdeng ki nongshim bynta kiba ha ka rta kaba 75 snem shaneng kaba long ha Hyderabad mynta u snem, i Kong Kmoiñ i la shah khot ha ka Pan India Masters Games Federation.
Kumjuh ka Kong Wandashisha ka dei ka kynthei kaba ju smat ban ïashim bynta ha kiba bun ki jingïakop mareh kiba la long shabar Jylla.
