Shillong, Naitung 19
Kan long ka sien nyngkong ïa ki khynnah ïalehkai ka Jylla ba kin ïoh ka lad ban pyni ïa ki sap ïalehkai ba kyrpang ha ka Meghalaya Youth League 2024, ka ban sdang mynta ka Sngi Saitjaiñ ha saw tylli ki district jong ka Jylla.
Ïa kane ka lympung ïalehkai kaba kynthup lang ïa ka kyrdan ïalehkai U-14 bad U-16 jong ki shynrang, yn pynïaid da ka Meghalaya Football Asso-ciation ha ryngkat ka jingkyrshan lang da ka tnat ïalehkai jong ka Sorkar Jylla.
Kane ka dei ka jingangnud ka MFA naduh ba ka la ïoh ïa ki nongkitkam bathymmai khnang ban ailad ïa 20 tylli ki synjuk ïalehkai kiba la pynïasoh ba kin sei ïa la ki jong ki kynhun ki ban ïashim bynta ha kane ka lympung.
Ka jingthmu jong kane ka lympung ka long ban jied ïa ki khynnah ïalehkai kiba kynsai ki ban ïoh ïa ka lad ban mihkhmat ïa ka Jylla sha ki lympung ïalehkai ki ban long shabar jylla. Kan plie ruh ïa ki nongïalehkai phutbol kiba dangrit ïa ka lynti ïaid sha ki klob bad ban pynlong ïa ka Meghalaya kum kawei na ki jaka ïalehkai phutbol ba khlaiñ tam ha ka ri.
Ïa kane ka lympung la pyllait paidbah ïa ka trophy da u Myntri Rangbah ka Jylla u Conrad K. Sangma ha ka taïew ba la lah.
Te kumta mynta ka sngi Saitjaiñ yn pynlong ïa kane ka lympung ha baroh saw tylli ki zone ha kaba yn ïohi ïa ki kynhun ki ban ïakhun ha ka rukom ïakhun ha la ïing bad shabar shwa ba ki kynhun kiba tbit tam kin ïoh rung sha kawei pat ka wat.
