Shillong, Naitung 19
Ka Meghalaya Swimming Association (MSA) ka la sdang ïa ka jingïakop jngi kaba la tip kum ka 17th State Aquatic Championship 2024 ha ka Sngi Thohdieng ha ka pung Crinoline, Shillong kaba la wan ïashim bynta 140 ngut ki nongjngi na kylleng ka Jylla.
Ka jingthmu jong kane ka jingïakop ka long ban jied ïa ki nongjngi kiba kynsai naduh ki Sub-Junior bad Junior ki ban mihkhmat ïa ka Jylla sha ka National Swimming Competition ka ban long ha Odisha ha u Nailar mynta u snem, katba ka kyrdan Senior kan long ha Mangalore, Karnataka jong ujuh u bnai.
Haba pynpaw ha ki lad pathai khubor, u Secretary kane ka synjuk u Bah Ïan Lyngdoh u la pynpaw ba ki nongïalehkai ka Jylla ki la nangkiew ha ka jingïakop jngi bad kyrmen ba kin lah ban ïalehkai bha wat hapdeng ki jingeh namar ka jingbym don ïa ka pung jngi kaba 50 mitar hapoh ka Jylla. “Ngi sngewkmen ïa ka jingtuid ki nongwan ïashim bynta ha kane ka jingïakop jngi kaba ar sngi kynthih ha kaba ki la don haduh 140 ngut. Ha ka kyrdan Senior ki don kumba 40 ngut bad ki don kumba 100 tam ha ka kyrdan junior bad sub-junior.”
“Kawei ka jingeh kaba kum ki khynnah ki ïakynduh ka long ba ngim don ïa ka pung jngi kaba 50mitar bad kaba ngi don mynta ha Crinoline kaba tang 25 mitar. Dei na kane ka daw ba kim lah bha ban ïalehkai ha ki lympung ïakop kiba la ju pynlong shabar jylla,” la bynrap u Bah Ïan uba la pynpaw ruh ka jingai khublei ïa ka Sorkar Jylla lyngba ka tnat ïalehkai kaba la theh ki lad jingïarap ïa ki nongïalehkai bad kumjuh ïa ki synjuk ïalehkai bapher bapher.
