Shillong, Naitung 24
Ka Meghalaya Power Lifting and Fitness Association ka la rai ba naduh mynta u snem kan phah noh tang ïa ki nongïalehkai kiba kynsai ki ban mihkhmat ïa ka Jylla sha ka rynsan ïakop rah nar ki ban long shabar jylla.
Kane ka la wan hadien ba u nongrah nar ka Jylla u Dr. Sagid Nagi u la khur ïa ka takma ksiar ha ka jingïakop rah nar ba la tip kum ka National Master Equipped and Classic Power Lifting Championship 2024 kaba la long ha Indore, Madhya Pradesh bad kane ka long ka sien kaba nyngkong ïa ka Jylla ban khur ïa ka takma ksiar.
“Kumba ka long ha ki snem kiba la dep ngi la ju phah bun ki nongïashim bynta sha ki lympung ïalehkai shabar jylla, hynrei ngim shym la ïoh kheit ïa u soh ka jingjop bad ka shu long tang ka jingpynlut kai ïa ka pisa,” la pynpaw u President ka synjuk u Bah Rocky Diengdoh.
Haba ïakren bad ki nongthoh khubor ha ka sngi Balang, u Bah Diengdoh u la ong, “Mynta u snem ngi la ïoh ban kheit ïa u soh ka jingjop ha ka sien kaba nyngkong eh namar ngi la ïoh kawei ka takma ksiar lyngba u Dr. Sagid Nagi uba la 60 snem ka rta. Ha ka jingshisha ngi la phah tang ar ngut, hynrei uwei u la lah ban pynurlong ïa ka jingjop.”
“Lyngba une u soh ka jingjop, ngin pynkhreh ban phah beit tang ïa ki nongïalehkai kiba kynsai bad kiba lah ban pynpaw ïa ka jingtbit ha ki jingïakop rah nar ki ban long hapoh ka Jylla (State Level) bad ngin ym phah shu kham bun kumba long ha ki por ba la leit,” u la bynrap.
Halor kane ka bynta katei ka synjuk kan pynlong ïa ka jingïakop rah nar ba la tip kum ka Powerlifting Competition 2024 ha ka 7 tarik u Nailur 2024 ha Savio Hall kaba ha Laitumkhrah, Shillong.
Ka jingthmu jong kane ka jingïakop ka long ba pyllait ïa ki khynnah samla na ki jingsniew ba bun jait bad ruh ban plie lad ïa ki ba kin pyni ïa ki sap ba kyrpad bad ha kajuh ka por ban plie lad ïa ki nongrah ba kin ïoh ban ïashim bynta ha ki jingïakop rah nar ki ban long shabar Jylla.
“Kane ka jingïakop rah nar ka long na ka bynta baroh ki nongïashim bynta naduh ki khynnah, ki samla haduh ki rangbah,” la pynpaw u Treasurer u Bah Robinson Kharnari.
