Shillong, Naitung 31
Hadien ba ka la thikna ban rung sha ka quarterfinal, ka India kan pynkhreh ban ïakhun pyrshah ïa ka Belgium kaba la bat ïa ka nam lahduh, ha ka jingïakhun kaba kham eh jong ka Pool-B ha ka Olympic Games ka ban long ha ka Sngi Palei ha Paris.
Ka Belgium ka dangdei ka kynhun kaba danglamkhmat ha ka Pool-B da kaba jop lai sien ïakhun, katba ka Indian ka la don ha ka kyrdan ba-r da kaba jop arsien bad ïakhaid shisien. Ka Australia ka don ha ka kyrdan kaba lai da kaba kamai hynriew poiñ hadien ba ka la jop ar sien bad ka la shah rem shisien. Ka Argentina ka la rung ruh sha ka Quarterfinal da kaba kamai saw poiñ na ki lai tylli ki jingïakhun, kaba kynthup ïa ka jingjop, ka jingïakhaid bad ka jingshah rem.
Ka New Zealand bad ka Ireland ki la duh ïa ka lad ban jam sha ka quarter final hadien ba ki la shah rem lai sien lynter. Tang ki saw tylli ki kynhun kiba la don ha ka kyrdan basaw ki ban ïoh rung sha ka quarter final.
Kumba ka paw ka India ka la sdang da ka jingjop 3-2 kol ïa ka New Zealand bad hadien ka la lah ban pynïakhaid hashwa ban wai pyrshah ïa ka Argentina.
Hynrei pyrshah ïa ka Ireland, ka la long ka jingïalehkai kaba pher bak-ly-bak na ki nongïalehkai ka India ha baroh ar tylli ki wat jingïakhun bad ha kaba kut ka la lah ban khur ïa ka jingjop na ka bynta ban jam sha ka quarter final.
U kapten ka India u Harmanpreet Singh sa shisien u la lah ban pynurlong na ka bynta ban khur ïa ka jingjop ha kaba nyngkong da kaba u la ïoh ban thep lyngba ka penalty bad kawei pat lyngba ka penalty corner na ka bynta ban pynlong ïa ka kynhun jong u ban khur ïa ka jingjop kaba kongsan ha kane ka lympung.
Ki nongïalehkai ka India ha ka bynta kaba shapdeng kum u Manpreet Singh u rangïalehkai ba la rim bad uba la ïoh ban ïalehkai saw sien ha ka Olympic bad u vice-captain u Hardik Singh ruh u la lah ban ïalehkai bha ha kane ka lympung. Kumjuh u Mandeep Singh, Lalit Upadhyay, Gurjant Singh bad Sukhjeet Singh ki la lah ban pynpaw ïa ka jingtbit ha ka bynta kaba shakhmat.
Hadien kane ka jingïakhun ïa ka Belgium, ka India kan pynkut ïa kane ka jingïalehkai (pool) pyrshah ia ka Australia ha ka Sngi Thohdieng.
