Jowai, Nailar 01
Ka lympung ïalehkai phutbol Under-17 kaba la tip ruh kum ka Independence Day Cup 2024 ba la pynïaid da ka West Jaiñtia District Sports Association (WJDSA) ka la sdang ha ka Sngi Palei ha madan Kiang Nangbah Stadium, Jowai.
Ha ka jingïalehkai kaba nyngkong, ka Luti Tuber Ïalong ka la ïoh jingjop hadien ba ka la lah ban pynliem noh ïa ka Katholik Youth Mihmyntdu da 3-1 kol. Ïa ki kol jong ka Luti Tuber la thep ar kol da u Hawni Phawa ha ka minit kaba 31 & 40, katba ïa kawei pat la thep da u Deiborpho Lhuid (60+3). Ïa ka shi kol na ka Kotholick Youth Mihmyntdu la thep da u Honesty Phawa ha ka minit kaba 60+1.
Ha ka jingïalehkai kaba bud, ka Da I hi Mynsngat ka la pynliem ïa ka Dongmihsngi lyngba ka shi kol ba la thep da u Daïoshwa Siangshai ha ka minit kaba 29.
Ha kawei pat ka jingïakhun, ka 7 Wasa ka la pynliem ïa ka Khimusniang lyngba ka shi kol ba la thep da u Kam ohi Biam ha ka minit kaba 27.
Haba phai sha kawei pat ka jingïalehkai kaba khatduh jong kane ka sngi, ka Mynthong ka la pynliem ïa ka FAM da 2-0 kol. Ïa kine ki kol la thep da u Chitlang Sumer ha ka minit kaba 7 bad u Da-o-Hi Paia Pakem (19).
