Shillong, Nailar 01
Ka jingwan jong ka lympung ïalehkai 133rd IndianOil Durand Cup ha ka sien kaba nyngkong eh ha kane ka nongbah ka la long ka jingthrang bad ka jingangnud jong kiba bun ki paidbah ‘riew ïeit phutbol ha kylleng ka Jylla na ka bynta ban sakhi ïa ka jingïalehkai kaba nyngkong jong ka Group-F ha ka Sngi Thohdieng.
Ha kane ka lympung, ka Shillong Lajong FC kan ïakhun pyrshah ïa ka ka kynhun kaba na Nepal ka Tribhuvan Army FC ha ka por 4 baje janmiet ha Jawaharlal Nehru Stadium, Polo.
Kumba ka paw haduh ka Sngi Palei ka jingdie ïa ki tiket ka la long kaba ïaid ïew bha ha kaba la lah ba die lut baroh naduh ki jaka shong kiba shalor bad wat ha ki bynta kiba kham shatrai. Namar kata, la khmih lynti ba ki paidbah kin pyndap lut ïa baroh ki jaka shong kiba la dep ban pyndait da kiba dang thymmai.
Wat la ym pat dep pura ka jingmaramot ïa kane ka Stadium, hynrei na ka liang u Myntri Rangbah ka Jylla u Conrad K. Sangma un wan ban plie pyrda ïa kane ka lympung ha kaba yn ïadon lang u Air Marshal S.P Dharkar, PVSM, AVSM, Air Officer Commanding in Chief, Eastern Air Command bad u Lt. General Ram Chander Tiwari, UYSM, AVSM, SM, GOC-in-Chief, Eastern Command.
Ïa kane ka jingplie pyrda yn sdang da ka Air Show kaba itynnad bad bud sa ka jingrwai Bhangra bad Gatka da ki kynhun shipai ka 2nd bad 13th Battalion jong ka Sikh Regiment. Nangta yn bud sa ka jingpyni ïa ki thuk thuk ba shlur ki shipai jong ka Military Police. Nangta yn ïoh ka jingrwai na ka Children Choir bad ka jingshad halor ka jingrwai “Badloo Ram Ka Badan” da ki khynnah shynrang jong ka Assam Regimental Centre.
Ka jingshad kaba khatduh kan long ka Musical Ensemble kaba la don palat 800 ngut ki khynnah skul na ki skul bapher bapher jong ka nongbah Shillong. U Myntri Rangbah ka Jylla un ïakynduh ïa ki nongïalehkai shwa ban sdang ïa ka jingïalehkai na ka bynta ban khublei kitbok ïa baroh kar ki kynhun bad ruh ban plie ki jingïaleh-kai jong ka Group-F kiba don baroh 6 tylli.
Kane ka jingplie kan kynthup ruh ïa ka jingïaid paidbah da kaba rah ïa ki lama jong kane ka lympung bad ki trophy. Yn pynphuh iphieng ïa kane ka lympung da ki jingrwai na ki nongrwai ba paw kum ka Gracyl bad Dapelai, u Lamphang & Choir bad khatduh eh ka Cynda ki ban pynhun ïa ki paidbah lyngba ki jingrwai jong ki.
Nalor ka Shillong Lajong bad ka Tribhuvan Army, kiwei pat ki kynhun kiba don ha kane ka Group-F ki kynthup ïa ar tylli ki kynhun ïalehkai jong ka Indian Super League, ka FC Goa bad ka Hyderabad FC.
