Shillong, Nailar 04
Ka West Jaiñtia District Sports Association (WJDSA) ka la long ka Synjuk kaba la ïoh ïa ka jingjop kaba heh ha ka sngi ba lai jong ka lympung Meghalaya Youth League 2024. Kane ka synjuk ka la jop ha baroh ar tylli ki kyrdan ïalehkai da bun kol kata ha ka U-14 bad U-16 kaba la long ha ka sngi Saitjaiñ.
Haba phai sha ka jingïalehkai, ka WJDSA ha ka U-14 ka la lah ban pynliem noh ïa ka Laskeiñ Block Sports Association da 12-0 kol ha kaba u Ram Passah bad u Kaisarmi Dkhar ki la ïoh ban khyrwit ïa ka hat-trick ha ka jingïalehkai kaba la long ha Kiang Nangbah Stadium, Jowai bad ha ka U-16 ka la lah ban pynliem noh da 5-1 kol.
Hadien ar tylli ki jingïalehkai ha ki ar tylli ki kyrdan, ka WJDSA ka dang dei kaba lamkhmat ha ka Zone B da kaba khur 6 point.
Haba phai pat sha ki jingïalehkai ka Zone-C kaba la long ha Umdihar Mini Stadium, ka Ri-Bhoi District Sports Association kaba la ïalehkai 3 tylli ki jingïalehkai, ka la long ka kynhun ba nyngkong ban khur 9 point ha ka kyrdan U-16, kata hadien ba ka la pynliem noh ïa ka Western Ri-Bhoi Sports Association da 5-0 kol.
U Me-u-ba-ai Sumer jong ka RBDSA u la kylla long u nongthep bun kol eh ha kane ka kyrdan hadien ba u la khyrwit ïa ka hat-trick ha ka jingïakhun pyrshah ïa ka Western Ri-Bhoi, bad mynta u la ïoh haduh 5 tylli ki kol.
Katba ha ka U-14 pat ka RBDSA kam pat shym la ïalehkai ha kane ka taïew. Ka Pyndengumiong District Sports Association ka la long ka kynhun ba nyngkong ban kamai 9 point hadien ka jingjop da 1-0 kol ha ka jingïalehkai pyrshah ïa ka Nongstoin District Sports Association ha ka U-14 jong ka Zone D kaba la long ha madan Dommawlum.
Haba phai pat ha kawei ka jingïalehkai jong ka Zone D, ka Mawshynrut Sports Association ka la lah ban pynliem noh ïa ka Tyrsad Area Sports Association da 3-1 kol, ha ka jingïalehkai kaba la long ha madan Riangdo.
