Jerusalem, Nailar:
Ki shipai ka Israel ha kane ka kynti ki la pyntikna ba ka Bilha Yinon kaba long ka briew ba khatduh ba ka Israel ka la buh ha ka thup kyrteng jong kito kiba jah rngai na ka jing-leit hiar thma jong ka Hamas ha ka 7tarik Risaw 2023, ba ka la dep khlad ha ka kti jong ki lehnoh Hamas naduh katei ka por ba la rahbor ia ka na Israel sha Gaza.
La ong ba ki shipai IDF jong ka Israel, ha ka Sngi Ba-ar ki la pyntip sha ki bahaiing- bahasem jong katei ka briew ba ka Bilha Yinon kam doh shuh bad ka la dep khlad la slem bad la bun bnai naduh ba ka la shah rahbor ha ki lehnoh Hamas.
Namar la ong ba ki shipai Israel bad ki kynhun wad bniah, ki la dep wad bniah bha shaphang katei ka samla hynrei kim shym la lap sabut eiei pat baroh shi katta.
Da kaba pynshong nongrim ha ki sakhi sabut ba la ioh lum baroh, ki kynhun wad bniah bad ki riew shemphang ka Israel ki la pynthikna ba la pyniap ia ka ha ka 7 tarik u Lber.
Ka Hamas ka la hiar thma ïa ki shnong ba shathie jong ka Israel ha katei ka sngi (7 tarik Risaw, 2023), kaba la wanrah ïa ka jingïap jong ki 1,198 ngut ki nong Israel ha katei ka por bad kiba bun na kitei kiba khlad ki dei hi ki riew paidbah.
Nalor kata, ka Hamas ka la rahbor ruh ia 251ngut ki briew na Israel ha katei hi ka por ba ka leit thombor ia ka Israel ha u Risaw, ha kaba 111 ngut napdeng jong kitei kiba shah rahbor baroh, ki dei kiba dang don ha ka kti jong ki lehnoh Hamas hapoh Gaza, kynthup ia ki 39 ngut kiba ka tnat shipai Israel ka la pyntip ba ki la dep khlad ha ka kti ki Hamas.
Kumta, la ong ba ka jingleit hiar thma bad ka jingpynhiar kput jong ka Israel ia ka Hamas hapoh ka nongbah Gaza haduh kane ka kynti pat, ka la nang kyntiew ia ka jingdon jong kiba khlad baroh sha ka 39,653 ngut, kynthup ia ki dkhot ka kynhun lehnoh Hamas bad kiba bun ki dei hi ki riew paidbah kiba don lang ha kito ki jaka ba ka Israel ka leit hiar thma ia ki dkhot ka Hamas.
