Gaza, Nailar:
Katkum ki khubor la iathuh ba ka Hamas ha ka Sngi Ba-ar ka la jied ïa uwei na ki heh nong-ialam jong ka u Yahya Sinwar ban long kum u nongïalam bathymmai u ban mih bujli ha ka jaka jong u nongialam barim u Ismail Haniyeh uba la kyllon iap noh ha ka jingleit thombor ki shipai ka Israel hapoh ka nongbah Tehran jong ka Iran ha kane ka taiew ba la dep. Kane ka jingjia ka la wanrah ruh ia ka jingbitar kaba jur na ka liang ki kynhun lehnoh jong ki ri bapher bapher kiba ai jingkyrshan ia ka Hamas baroh shi katta.
Kumta, la ong ba ka Islamic Resistance Movement Hamas ha katei ka sngi, ka la pynbna halor katei ka jingjied thymmai ia u nongialam u ban lam khmat ia katei ka kynhun nangne shakhmat kum u khlieh jong ka Political Bureau jong katei ka kynhun.
La ong ba tang hadien khyndiat minit hi hadien jong katei ka jingpynbna, ka kynhun kieng atiar jong ka Hamas, ka Ezzedine Al-Qassam Brigades, ka la pyntip ba ka la dep siat da ki ‘namding na Gaza Strip sha ka Israel, kum shi bynta ban pynhiar kput halor katei ka jingleh donbor jong ka Israel haba iadei bad katei ka jingshah pyniap u nongialam ba hakhlieh duh jong ka.
Na ka liang ka tnat shipai bad ki heh nong-ialam jong ka Israel, ki la kynnoh ba u Sinwar, u dei uwei na ki nongsuh buit halor ka jingleit hiar thma jong ka Hamas pyrshah ia ka Israel ha ka 7 tarik jong u Risaw 2023.
Shuh shuh ruh la ong ba katei ka jingthung ïa u kum u heh ba thymmai jong ka Hamas ka long tang hadien shi taiew hadien ba u Haniyeh u la shah pynïap ha Iran.
Namar la ong ba ka Iran bad ka Hamas, ki la kynnoh pyrshah beit ba dei tang ka Israel hi kaba don kti ha katei ka jingshah pyniap u nongialam ka Hamas katba u dang leit ban sakhi ia ka jing pynbam smai ia u President ka Iran ha katei ka taiew ba la lah.
