Brazil, Nailar:
Katkum ki khubor, la ong ba uwei u rangbah u la lait im na kawei ka jingjia kaba shyrkhei hadien ba u la poi slem sha ka Kad Liengsuiñ kaba u la dei ban shong ha ka liengsuiñ ‘Voepass 2283’ kaba la sniew noh shiteng suiñ bad leit hap ha Sao Paulo. Ki briew kiba shong ha kane liengsuiñ bad ki bor pynïaid ruh ki la khlad lut ha kane ka jingjia kaba sngewsih.
Haba iakren bad ki nongthoh khubor, u Adriano Assis u la iathuh ba haba u leit poi sha katei ka Kad Liengsuiñ ha katei ka sngi, ki bor pynïaid bad ki nongap pahara jong katei ka Kad Liengsuiñ ruh kim shym la shah shuh ia u ban rung namar ba u la slem ia ka por ba la buh ia ki nong-leit-nongwan ba kin kiew bad rung noh shapoh ka liengsuiñ.
Kumta, la ong ba katei ka jingsniew bok jong u da kaba u poi slem sha katei ka Kad Liengsuiñ, ka long pynban ka bok kaba khraw ba u la lait im na katei ka jingjia kaba shyrkhei.
