Washington, Nailar:
Uwei u briew na America uba la pyn kohnguh ia ka samla lajong ban ñiah kali sha kawei ka khlaw bad hadien kata u la teh ia ka ha uwei u dieng ynda la poi sha ka jaka ba u thmu bad peitkai ruh ia ka katba ka dang ia ksaid ban lait im tad haduh ba kan da iap syndon. Na liang ka ïingbishar ka la rai ban set patok noh ia u baroh shi jingim halor katei ka kam runar kaba u la leh ha u snem 2019.
Kumta, ha ka Sngi Ba-ar, u John Matthew Chapman, 44 snem ka rta, u la shah rai pynrem halor katei ka jingrahbor kaba la wanrah ïa ka jingïap jong katei ka samla kaba la ithuh kyrteng kum ka Jaime Feden bad kaba la don 33 snem ka rta. La kem ia u ha u bnai Naiwieng jong u snem 2019, ha kaba u la phla ba katei ka jingpyniap jong u ia katei ka samla ka long tang namar ka pisa.
Ki pulit ka tnat toh-kit, ki la iathuh ba utei u briew ha ka por ba la tohkit bniah ia u, u la phla ba u la ialam ñiah kali kali ia katei ka samla sha ka khlaw kaba don hapoh Nevada, da kaba ong ba kin ia leit shangkai bad ban ioh iashon dur sha katei ka khlaw kaba itynnad bad kynjah.
Hynrei, tang mar ia poi ha katei ka jaka, la ong ba u Chapman u la teh da u tyllai ia ki kti bad kjat jong ka Feden ha uwei u dieng shuwa ba un set noh syndon ia ka shyntur bad khmut jong ka da ka kynja jingtah ‘duck tape’ bad peit kai ia ka katba ka dang ksaid shitom ban ioh ring mynsiem. Ka Jaime namar ba ka la shah set ka shyntur bad khlem ioh lyer shuh ban ring mynsiem ka la iap noh syndon. Hadien ba ka la dkut mynsiem, utei u briew u la phla ba u la weng noh ia kitei ki jingtah, u tyllai bad u la pynlaw noh ruh ia baroh ki jaiñ kiba ka phong na ka met jong ka bad u la tan bad ieh ia ka met ha kawei ka jaka shyiap harud um.
Ha u Naiwieng jong utei u snem 2019, ka paralok jong ka Feden ka la pyntip ba kam shym la ioh jingtip eiei shuh shaphang jong katei ka samla bad kumta ryngkat lang bad ki para marjan jong katei ka samla, ki la ia leit ban ujor sha ki pulit jong katei ka nongbah. Na ka liang ki pulit kim shym la iohi ne lap shuh ia katei ka samla 33 snem la bun bnai ba ki la thwet bad buddien ia ka, hynrei ki la ong ruh ba ki la iohi ia u briew uba ki ngeit skhem ba u dei u lok jong ka uba wan rung bad mih na iing jong ka lyngba ki kor ring dur ba la pyndait ha ka iing sah jong ka ha katei ka jaka.
Ki pulit ki la iathuh ruh ba ynda ki la leit ban talasi hapoh ka iing jongka, ki lap ia ka ID bad ki kot- ki sla jong u Chapman, ka mobile phone jong ka Feden bad bun tylli ki song jong kitei ki jingtah ‘duct tape’ bad ki tyllai ba la dep pynlut.
Kumta, ki pulit ki la thwet bad kem noh ia utei u briew, tad haduh ba un da phla hi noh da lade halor katei ka jingjia baroh tang namar ka jingkwah spah bad jing rhah spah jong u.
