Khan Younis, Nailar:
Ka Israel ha kane ka por ka la bthah ia ki paidbah na ka thaiñ Khan Younis kaba don sha ka phang Shathie jong ka nongbah Gaza ba kin mih noh na katei ka bynta hadien ba la ioh ia ka jingiap jong ki 90 tam ki riew paidbah na ka jingleit thombor ki liengsuiñ ka Israel ia kawei ka skul kaba la pynsah ia ki riew paidbah naduh ba jur ka thma hapdeng ka Hamas bad ki shipai Israel. Kumta, la ong ba ha ka miet ba la leit, da ki phew hajar ngut ki paidbah nong Palestine kiba shong ha katei ka bynta jong ka nongbah Gaza, ki la hap ban mih noh bad ban leit phet rieh sha kiwei pat ki bynta kiba ka Israel ka la bthah ia ki ban shong shipor khnang ban lait na ki jingma jong ka thma hapdeng ka Israel bad ki Hamas.
Namar ka tnat shipai Israel ka la pyntip ba ha katei ka miet, ka thmu ban ther bom sha katei ka bynta ba don ki dkhot jong ka kynhun lehnoh Hamas, ha kaba kitei ki dkhot ka Hamas ki pyrshang ban buhrieh ialade ha katei ka jaka ba sah ki riew paidbah khnang ba ka Israel kan ym nud ban leit thombor.
Namar ha ka miet Sngi Saitjaiñ la ong ba ki shipai ka Israel ki la leit ther bom sha katei ka skul kaba ki paidbah ka Gaza ki la pynlong kum ka jaka sah paidbah, namar kim don iing- don sem shuh bad tang katei ka jaka ka ban pynsuk ia ki ba kin shu ia don lang noh khrui shi jaka bad ban lait sakma ne kylla phetwir sha kiwei- kiwei pat ki bynta kiba ap jingma na ka thma jong ka Israel.
U heh ka United Nation ba dei khmih ia ki paidbah phetwir ha Gaza, u la ong ba ki paidbah nongshong shnong ka Gaza, kim don jaka shuh ban leit phet rieh shano- shano ruh bad ki la shah kerkut bad shah khang kut ha katei hi ka jaka bad ka dei sa tang ka jingiap hi ka ban pyllait ia ki na kitei ki jingeh ba ki kynduh baroh.
Ki don ruh ki paidbah ki bym ioh shuh wat ban rah ia ki jingdon- jingem ne ki jingdonkam ba kongsan eh jongki ruh hynrei ki la shu kit tang ia ki khun- ki kti bad ki jaiñ ba ki phong ha ka met jongki hi.
Namar la ong ruh ba ki shipai Israel ki la leit therbom haduh 30 tylli ki jaka ba suba ban don ki lehnoh Hamas tang hapoh jong kine ki 24 kynta ba la leit.
