Tel Aviv, Nailar:
Ka tnat syntiat jong ka Israel ha ka Lah Sngi U Blei ka la pyntip ba ka ngeit ka Iran ka la dep rai ban thombor bad ban leit hiar thma beit ia ka Israel bad ba kan sa leh noh ruh ia kane ka kam tang hapoh jong kine ki khyndiat sngi ki ban wan.
Namar la ong ba ka Iran ka la bitar haduh katta halor ka jingleit thombor jong ka Israel ia u nongialam ba hakhlieh duh jong ka Hamas- u Ismail Haniyeh, uba la kyllon iap noh ha ka jingleit ther bom ki liengsuiñ ka Israel sha ka nongbah Tehran jong ka ri Iran, ha ka jaka ba utei u nongialam ka Hamas u sah shipor katba u dang leit ban sakhi ia ka jing- pynbam smai ia u President ka Iran ha kine ki khyndiat taiew ba la leit.
Kumta, la ong ba ka Iran ka la bitar haduh katta namar ka jingnud jong ka Israel ban leit rung shaduh u pud- u sam jong ka Iran bad ban leit thombor ia utei u nongialam ka Hamas katba u dang don hapdeng ka jingiadei kam bad ka Iran.
Namarkata, ka Iran ka la pynbna ba kan sa hiar thma beit ia ka Israel khlem da pynslem shuh namar katei ka jingleh bym suitñiew jong ka Israel ia ki kyndon aiñ jong katei kawei pat ka ri, namar ban shu leit rung khlem da ioh jingbit sha kawei pat ka ri, ka long ka jingpynkheiñ ia ki aiñ ki kyndon jong kawei pat ka ri.
