Shillong, Nailar 12
Ka Meghalaya Veteran Table Tennis Association (MVTTA) ka la pynlong ïa ka lympung ïalehkai Meghalaya Masters TT Team Championships kaba hynriew ha ka Sngi Saitjaiñ ha Indoor Hall kaba don ha JNSC, Polo.
Ha kane ka lympung ïalehkai kaba la pynlong tang shisngi la wan ïashim bynta da ki nongïalehkai Table Tennis barim na kylleng ki district jong ka Jylla.
Ki don haduh phra tylli ki kynhun kiba la ïashim bynta kiba kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ka kynhun Stay Fit ka la rah ïa ka nam lahduh hapoh ka jingïalam da u Bah Gilbert Sohtun. U paralok jong u, u Arup Nag na Tura u la long u khlur ba kynsai ha ka phainal, da kaba pynliem ïa u kapten jong ka kynhun Save Earth u Sarwan Gareri ha ka straight set da 3-0. Ka Stay Fit Team ka la lah ban pynliem ruh ïa ka Save Earth Team da 3-2 ha ka final. U Satish Pradhan jong ka Save Water Team u la ïohpdiang ïa ka nam Player of the Tournament.
La sam ïa u Subir Dey da ka khusnam kyrpang na ka bynta ka jingnoh synñiang kaba long ka nuksa jong u ha ka kam ïalehkai ha ka jinglong kyllum bad ha ka phutbol khamtam.
Ha katei ka sngi la ïadon lang u Nababrata Bhattacharjee, Advisor on environment sha u Myntri Rangbah ka Jylla bad uba long ruh u President ka Meghalaya Cricket Association kum u kongsan ha kaba la ïadon lang ruh u Bruce Marak, President ka MTTA, Bah A. G. West , President ka MVTTA, u Bishu P. Joshi, Secretary MVTTA, Santanu Ghosh, Organising Secretary, u Vijay Thapa, Treasurer ka MVTTA bad kiwei kiwei.
