Sydney, Nailar:
Katkum ki khubor, la iathuh ba ha ka Sngi U Blei, kawei ka liengsuiñ ‘helicopter’ ka la leit hap bakla ha tnum jong kawei ka iing-basa ha ka nongbah Cairns kaba pawnam bha ha ka thaiñ Shatei jong ka Australia. Ha kane ka jingjia u nongniah jong ka helicopter u la khlad noh syndon hashen. Ha katei ka sngi la bthah ia ki spah ngut ki nongwan jngohkai ban mih bad kiar noh na katei ka thaiñ namar jong katei ka jingjia.
La ong ba ki briew ka tnat iarap ‘Emergency’ ki la ioh jingtip ha ka por kumba 2 baje mynstep jong ka kylla step Lah Sngi U Blei halor ka jingleit hap jong katei ka helicopter kaba don ar tylli ki enjin bad kaba la leit kum tynrah ïa ka tnum jong katei ka iing-basa. Kane ka la wanrah ruh ia ka jingpluh ha ka bynta shajrong jong katei ka iing-basa bad la hap ban pynkynriah noh ia ki briew kiba don hapoh baroh ban lait na kino- kino ki jingma.
Ki pulit ki la iathuh ba ka jingtohkit ka dang iaid sha khmat ban lap ia ka daw tynrai halor ka jingthut ne ka daw jong ka jingleit hap jong katei ka liengsuiñ ha katei ka step.
Haba iadei bad kane, la ong ba ym shym la don kino-kino kiba ngat ne shah ktah lane mynsaw lait noh tang utei u pilot hi uba la khlad noh syndon hajuh ha ka por ba katei ka liengsuiñ ia tyngkhuh bad katei ka iingmala.
Kane ka la jia ha ka iing-basa Double Tree Hotel jong ka Hilton kaba don ha ka nongbah Cairns jong ka Australia bad kaba long ruh ka khyrdop kaba kongsan sha ka Great Barrier Reef jong ka Australia.
