Washington, Nailar:
U Donald Trump, ha ka Sngi Nyngkong u la kren bad pynkynmaw ia ka khyllipmat ka jingshah siat jong u ha ka jingialang paidbah ha Pennsylvania ha u bnai ba la dep bad u la iathuh ia ki jingjia kiba bud hadien katei ha ka jing-iakren bad u trai jong ka ‘X’ – u Elon Musk.
Watla u Trump u la lait im na katei ka jingpyrshang pyniap ia u ha katei ka por, hynrei la ong ba u la mynsaw jur ha ki bynta jong ka shkor kaba la shah ksam ha utei u kuli ba la siat da utei u nongthmu pyniap ha katei ka jingjia.
Hynrei u Trump u la ong ba katei ka jingjia kam shym la pyntieng- pynsyier eiei ruh ia u namar u don ka jingshaniah ha u Nongpynim bad ha u Trai nongbuh- nongthaw, namar kata katei ka jingjia ka la nang pynskhem shuh-shuh pynban ia ka jingngeit bad ka rukom im jong u kum u riewngeit. U Trump ha katei ka sngi haba u ai jingkren sha ki paidbah lyngba katei ka jingiakren jong u bad utei u heh ka rynsan Social Media ‘X’, u la ong “Na ka bynta kito ki briew ki bym ngeit ha U Blei, nga tharai ba baroh ngi hap ban sdang ban pyrkhat ia kata”.
Namar u la pynshai ruh ba ki rai bad jingthmu jong u ha kane ka sien, ki long kiba janai bad kiba u la dep puson janai bha bad kan long ruh kaei- kaei kaba u leh naka bynta ki paidbah bad katkum ka mon ka jong u Blei. Namar u ong ba lada kam dei ka jingpyniaid ka jong u Blei, un nym poi pyrkhat ban kynriah ne phai ia ka khlieh jong u sha kawei pat ka phang, ha ka por ba utei u nongsiat u thmu ban shim ia ka jingim jong u. Bad tang da kaba phai ia ka khlieh jong u sha kawei pat ka liang, u la lai im na katei ka jingjia kaba shyrkhei bad kaba lah ban shim noh syndon ia ka jingim jong u. Hynrei, u la ong ba um sngew pher eiei halor kane, namar baroh ki long ki kam phyla bad ka jingiada jong u Blei bad u ngeit skhem ruh ha kata.
Utei u nongsiat, uba la ithuh kum u Thomas Matthew Crooks, u la pynmynsaw ia ki arngut ki nongleit sha katei ka jingialang paidbah jong u Trump ha katei ka por bad u la ioh ruh ban pyniap ia uwei pat u riew paidbah shwa ba un shah siat iap kylla noh ha ki pulit ka tnat Secret Service.
