Ranchi, Nailar:
Ka jingai rai ba dang shen jong u MLA shimet na Jamshedpur East bad Myntri barim u Saryu Roy ban pynïasoh bad ka Janata Dal (United) ka la wanrah ïa ka jingkynthoh hapdeng ki nongïalam bad ki dkhot halor ka jingthmu ba un ïakhun ïa ka ilekshon Assembly ka ban sa wan ha ka jylla na Jamshedpur (East) kum u kyrtong jong ka seng JD(U).
U Roy uba mihkhmat mynta na Jamshedpur (East), u la kdew shai da kaba ong ba ïa ka jinglong kyrtong jong u yn rai da ka kynhun nongïalam ka seng JD(U).
“Ka shong ha ka seng ban rai ïa ka bynta jong nga. Ka seng kan rai la nga dei ban ïakhun ne em ïa ka ilekshon Assembly bad lada ka long kumta, na kano ka konstitwensi ngan hap ban ïakhun”, u la ong.
Ki nongïalam bad ki dkhot jong ka BJP ha kane ka nongbah ki ngeit ba ka daw tynrai jong u Saryu ban ïasoh bad ka JD(U) ka long ban ïakhun ha ka konstitwensi kaba u don mynta kum u kyrtong jong ka kynhun National Democratic Alliance (NDA).
U heh nongïalam jong ka seng BJP bad u dkhot jong ka Executive Committee jong ka jylla, u bym kwah ban pynpaw kyrteng, u la ong, “U Saryu Roy u la sngewthuh ba ka lad jong u ban ïoh biang ïa ka jingjop kum ha u snem 2019 ka long kaba khim, dei na kata ka daw ba u la pynïasoh bad ka seng jong u Nitish Kumar ban ïakhun kum u kyrtong ba ïatreilang bad ka kynhun NDA.”
Une u heh nongïalam u la bynrap shuh shuh da kaba ong ba ka Assembly konstitwensi Jamshedpur (East) ka long kaba kongsan bha ïa ka seng, bad kam long kaba lah ba ka kynhun nongïalam ba kham halor kan ailad da kaba suk ïa ka shuki sha u Nitish Kumar.
Ha ka ilekshon Assembly ha u snem 2019, u Saryu Roy, uba dei u Myntri ha ka kynhun Myntri jong u Myntri Rangbah ha katei ka por bad u MLA ba dang treikam na Jamshedpur (West), u la kylla pyrshah ïa ka seng hadien ba la kyntait ba la kyntait bad ai tiket da ka seng.
U Roy u la pynïasoh bad ka seng jong u Myntri Rangbah ka Bihar u Nitish Kumar ka Janata Dal (United) ne ka JD(U).
Kane ka long shi bynta ka jingnang pynkhlaiñ shuh shuh ïa ka seng JD(U), kaba long ka seng ba la ïatreilang bad ka seng BJP ha ka sorkar pdeng bad ha Bihar ha shwa ban pynlong ïa ka ilekshon Assembly ha Jharkhand ha une u snem.
U Roy u la shah pynrung dkhot hapoh ka seng JD(U) ha ryngkat ka jingdonlang jong u dkhot jong ka Rajya Sabha u Sanjay Kumar Jha, ki Myntri jong ka Bihar kiba kynthup ïa u Ashok Choudhary bad u Shravan Kumar, bad u Khiry Mahto jong ka seng JD(U) ha Jharkhand ha ka sngi U Blei.
U Roy u la pyrshah ïa a seng BJP hashwa ban thaw ïa ka Bhartiya Janata Morcha.
Ha u snem 2019, u la ïakhun pyrshah ïa u Myntri Rangbah ha katei ka por u Raghubar Das na Jamshedpur (East).
Ki la don kumba 24 ngut ki nongïalam jong ka seng Rashtriya Janata Dal (RJD) ka liang pyrshah na Samastipur kiba la shah pynrung dkhot hapoh ka seng kaba bat ïa ka jingsynshar ha Bihar ha ka Sngi U Blei.
