Washington, Nailar:
Katkum ki khubor, la ong ba ka sorkar jong u President jong ka US- u Joe Biden, ha ka Sngi Ba-ar ka la mynjur ban phah tiar thma kiba shongdor $20 billion thymmai sha Israel, da kaba iaid lait ruh ïa ka jingpynbor jong ki nongïakhih ban sangeh noh ïa ka jingshalan ïa ki tiar thma sha Israel namar ka jingïap jong ki briew ha Gaza. Kumta kane ka jingmynjur jong ka US ban phah ia kitei ki tiar thma sha ka Israel, ka long ruh ha kum kane ka por ba u Biden u dang pynbor ia ka Israel bad ka Hamas ba kin sangeh noh ia ka thma hadien 10 bnai jong ka jing-iaumsnam ba katei ka thma ka la iaid.
Ha ka jingpynbna sha ka seng Congress, ka tnad kam shabar jylla ka la ong ba ka la mynjur ban phah ia ki 50 tylli ki liengsuiñ thma F-15 sha ka Israel ha ka dor kaba $18.82 billion kumba la dep ban iakut.
Ka Israel kan thied ruh haduh 33,000 tylli ki tup thma na ka US bad haduh 50,000 tylli ki bom pynbthei bad ki kali kit mar thymmai naka bynta ban pynkhlaiñ ia ka tnat shipai jongka, ba kin lah ban iakhun bad pynliem suk ia kitei ki lehnoh jong ka Palestine kiba synshar hi ia ka nongbah Gaza mynta da ki phew snem.
