Shillong, Nailar 18
Ka Shillong Lajong Football Club hadien ba ka la ïoh rung sha ka Quarter-Final jong ka lympung Durand Cup kaba dang ïaid shakhmat, mynta kan pynkhreh ban ïakhun pyrshah ïa ka East Bengal Football Club.
Ka jingïakhun Quarter-Final hapdeng ka Shillong Lajong pyrshah ïa ka East Bengal kan long ha ka 21 tarik mynta u bnai ha ka por 7 baje janmiet ha Jawaharlal Nehru Stadium, Polo ha nongbah Shillong.
Ha kawei pat ka jingïakhun Quarter-Final jong kane ka lympung ha SAI Stadium, Kokrajhar, ka jingïalehkai kan long ha ka 21 tarik Nailar ha ka por 4 baje janmiet hapdeng ka North East United Football Club pyrshah ïa ka Indian Army.
Lah ban kdew hangne ba ka Shillong Lajong ka la ïoh rung sha ka Quarter-Final, hadien ba ka la ïakhaid da mar shi kol ha ka jingïalehkai pyrshah ïa ka FC Goa kaba la long ha ka Sngi Saitjaiñ ha Shillong bad lyngba kane ka jingïakhaid watla ka jingïoh point ka la long mar katjuh hapdeng ka Shillong Lajong bad FC Goa hynrei ka Lajong ka la ïoh rung da kaba tam ha ka kol.
La khmih lynti ba ka jingïalehkai hapdeng ka Shillong Lajong pyrshah ïa ka East Bengal kan long kaba itynnad bha, watla ka East Bengal kan dei ka kynhun kaba kham khlaiñ bor hynrei ka jingïalehkai ha la ïing bad ryngkat ka jingkyrshan ba radbah jong ki paidbah, kan ai mynsiem shikatdei ïa ka Shillong Lajong ban ïakhun tyngeh ïa kane ka jingïalehkai.
La khmih lynti ruh ba ha kane ka jingïalehkai, ka jingwan jong ki paidbah kan long kaba kham bun shah shuh na kaei kaba la sakhi ha kine ki jingïaleh-kai ba la dep khamtam lei ba ka dei ka jingïakhun knieh rung sha ka Semi-Final.
Ki ar tylli kiwei pat ki jingïakhun Quarter-Final kin long ha ka 23 tarik Nailar, kawei ha JRD Tata Sports Complex ha Jamshedpur ha kaba ka jingïakhun kan long hapdeng ka Mohun Bagan pyrshah ïa ka Punjab bad kawei pat ka Quarter-Final kan long ha Vivek-ananda Yuba Bharati Krirangan, Kolkata hapdeng ka Bengaluru FC pyrshah ïa ka Kerala Blasters.
