France, Nailar:
Katkum ki khubor, la iathuh ba katei ka liengsuiñ rit ka la leit suh beit-beit sha duriaw ha ka Sngi Thohdieng katba dang iashim bynta ha ka jingpyni ‘Air Show’ harud katei ka duriaw jong ka thaiñ Shatei Lam Mihngi jong ka France, ha kaba u nongñiah jong katei ka liengsuiñ u la sahkut hapoh bad duh noh syndon ia la ka jingim ha katei ka jingjia ba sniewbok.
La ong ba katei ka liengsuiñ ‘Fouga Magister’ ka dang kiew shalor suiñ ban pyni-kai sha ki paidbah ha Le Lavandou ha ka ‘Air Show’ jong ka kynhun shipai liengsuiñ ba pawnam jong ka France, hynrei tang hadien katto- katne sien her, la ong ba katei ka liengsuiñ ka la thud bad leit suh beit- beit sha katei ka duriaw khlem bad u nongpynher jong katei ka liengsuiñ ruh um lah shuh ban tehlakam ia ka ha katei ka por.
Ia katei ka jait liengsuiñ ‘Fouga Magister’, la shna bad pynmih hadien jong ka Thma Bah ba Ar bad la ju pyndonkam ruh ia ka la bun snem da ki shipai liengsuiñ jong ka France khlem kano- kano ka jingthud ne jingma ba katei ka jait liengsuiñ kan wanrah ha kitei ki phew snem ba la ju pyndonkam ia ka baroh shi katta.
Haba iadei bad kane, la ong ba watla ka kynhun iarap ba kyrpang ka la ioh ban sei noh ia utei u nongñiah ha ka por kaba tang khyndiat khlem da shim por eh, hynrei ka long pat kaba sngewsih ba kim shym la lah shuh ban pyllait im ne ban pynim ia u.
Kumta ruh ia katei ka ‘Air Show’ la pynsangeh noh syndon hi khlem da pynslem tang mar ia sakhi ia katei ka jingjia ba sngewsih ha katei ka sngi.
Dang ha ka Sngi Balang, la ong ba 2 ngut ki pilot jong ka France, ki la duh ei ia ka jingim hadien ba ar tylli ki liengsuin iapom Rafale ki la ia-tyngkhuh ha shiteng suin ha ka thaiñ Mihngi jong ka France.
