Washington, Nailar:
U Secretary of State jong ka United States- u Antony Blinken ha ka Sngi Saitjaiñ u la leit hiar hi da lade sha Israel ban leit iakren bad ban twad jingmut halor ka jingiakut ban iakren sangeh thma kaba ka US ka la trei shitom baroh shi katta ban ioh ban wanrah noh ia ka jingiabeit hapdeng ka Israel bad ka Hamas bad ban tehlakam ruh ia ki jingma kiba ap ia ka pyrthei na katei ka thma Middle East.
Kumta la ong ba u Blinken ha kane ka sien leit jurip jong u sha Israel, un ialeh ban wanrah ia ka khubor kaba bha haba iadei bad ka jingiakren sangeh thma bad kumjuh ruh halor ka jingdonkam ban pyllait noh ia ki nongshah rahbor kiba dang don ha ka kti jong ki lehnoh Hamas tad haduh kane ka kynti.
Namar u President ka US- u Joe Biden ruh ha ka Sngi Thohdieng u la ong ba ka US ka la ialeh shitom ban wanrah ia ka jingiasuk hapdeng ka Israel bad ka Hamas bad ban tehlakam ruh ia ki jingma kiba ap ia ka pyrthei baroh kawei khamtam lada katei ka thma kan pur ha ka thaiñ Middle East baroh kawei.
Kumta, u Biden ha kane ka kynti u la ong ba katei ka jingthmu jong ka US kam pat long kaba sep-ei bad kam pat lah hi ruh ban pyn-urlong hynrei la ithuh shai ba ka la jan urlong shen tang ha kine ki khyndiat sngi ki ban wan, lada ka Israel ka kohnguh bad sngap ia ka jingkyntu jong ka US khnang ban lah ban kiar na ki jingma kiba khraw kiba ap ia ka Israel hi bad kumjuh ruh ia ka Middle East.
U Biden u la ioh ruh ban iakren bad u President ka Egypt- u Abdel Fattah al-Sisi bad u nongialam ka Qatar- u Emir Sheikh Tamim bin Hamad Al-Thani ban iatrei lang naka bynta ban wanrah ia ka jingiasuk hapdeng ka Hamas bad ka Israel bad ban pynkut noh ia katei ka jingiakynad ka ban poi sha u pud ka thma bah kaba jur ha ka pyrthei ha kine ki khyndiat por ki ban wan lada ym lah ban tehlakam noh katba ka por ka dang biang.
