Shillong, Nailar 18
Ka West Jaiñtia District Sports Association (WJD SA) bad ka Nongstoiñ District Sports Association (NDSA) ki la nang pynskhem jaka ha ka ‘group’ ka jong ki ha ka Meghalaya Youth League 2024 hadien ka jingkhur jingjop ha ka kylla kaba san.
Haba phai sha ka Zone B, ka West Jaiñtia ka la pynliem ïa ka Saipung Block Sports Association ha baroh ar tylli ki kyrdan kata ha ka U-14 ka la jop da 9-0 kol ha kaba u Kaisarmi Dkhar u la ïoh khyrwit hat-trick, kaba dei ruh kaba ar ka jong u ha kane ka lympung. Ha ka kyrdan U-16 ruh ka West Jaiñtia ka la jop da 2-0 kol ïa ka Saipung.
Hadien ka jingjop ha baroh ar tylli ki kyrdan, mynta ka West Jaiñtia ka la ïoh ban khur 12 point ha baroh ar tylli ki kyrdan bad ban dang ïai neh ha ka kyrdan banyngkong.
Katba ka Amlarem Block Sports Association ka la bteng ban don ha ka kyrdan kaba ar ha baroh ar tylli ki kyrdan kata hadien ba ka la pynliem noh ïa ka East Jaiñtia District Football Association da 7-0 kol ha ka U-14 bad da 2-0 kol ha ka U-16.
Ha ka Zone D, ka Nongstoiñ District Sports Association ka la pynliem noh ïa ka Tyrsad Area Sports Association da 5-0 kol ha ka kyrdan U-14 bad da 5-2 kol ha ka kyrdan U-16. Shwa jong kane ka jingïalehkai, ka Pyndengumïong District Sports Association ka dei kaba la don ha ka kyrdan ba nyngkong ha ka U-14 hynrei namar ka jingbym lah ban pynlong ïa ka jingïalehkai namar ka jingdum lyoh palat, la shu sam noh mar shi point ha ka jingïakhun pyrshah ïa ka Eastern Border Sports Association, kumta ka Pyndengumïong ka la ïoh 11 point katba ka Nongstoiñ ka la khur 12 point. Ha ka U-14, ka Mawkyrwat District Sports Association ka la pynliem noh ïa ka Mawshynrut Sports Association da 7-0 kol. Hynrei haba phai pat sha ka kyrdan U-16, ka Mawshynrut ka la pynliem noh ïa ka Mawkyrwat da 5-0 kol. Katba ka jingïaleh kai ha ka U-16 hapdeng ka Eastern Border pyrshah ïa ka Pyndengumïong ka la kut noh ha ka jingïakhaid da mar shi kol. Ha ka kyrdan U-16 ruh ka Nongstoiñ ka la lamkhmat da ka jingkamai 13 point katba ka Mawshynrut ha ka kyrdan ba ar.
