Shillong, Nailar 18
Ka lympung ïalehkai Asmita Khelo India Women’s League Judo Tournament 2024-2025 na ka bynta ka East Zone ka la sdang ha ka nongbah Shillong ha ka 17 tarik mynta u bnai ha SAI Training Center, NEHU, Shillong.
Ïa kane ka lympung la wan ban plie da u Director ka tnat ïalehkai jong ka Sorkar Jylla u DD Shira, ha kaba la ïadonlang u General Secretary ka Meghalaya State Olympic Association u Bah Finely Pariat, u Yogesh Dhadve uba long u Chairman jong ka MSOK, bad kumjuh ruh ki dkhot ka Meghalaya Judo Association bad kiwei kiwei.
ïa kane ka lympung la kyrshan lang da ka tnat ïalehkai jong ka Sorkar Pdeng lyngba ka Sports Authority of India (SAI), ha kaba la wan ïashim bynta da ki nongïalehkai Judo na kylleng ka thaiñ Shatei Mihngi jong ka ri kynthup na Bihar bad West Bengal ha ka kyrdan Senior, Junior, Cadet bad Sub-Junior. Ki la don kumba 45 ngut ki nongïalehkai ka Jylla kiba la ïoh ban pynpaw ïa ki sap ïalehkai ba kyrpang ban ïatynjuh bor bad ki nongïalehkai jong kiwei pat ki Jylla.
Ïa kane ka lympung yn pynkut ha ka 19 tarik Nailar 2024, ha kaba ki nongïalehkai ki ban khur ïa ka takma ksiar bad rupa kin ïoh pat ïa ka lad ban mihkhmat ïa ka East Zone sha ka wat kaba khatduh (final round) na ka bynta ban ïakhun pat bad kiwei ki nongjop na kiwei ki Zone.
