Shillong, Nailar 18
Ka Pdengshnong ka la ïoh rah ïa ka nam lahduh ha ka lympung 3rd Independence Cup 2024 ba la pynlong da ka Seng Samla Mawkynroh Umshing (SSMU) ha madan shnong Mawkynroh.
Haba phai sha ka jingïalehkai final kaba la pynlong ha ka Sngi Saitjaiñ, ka jingïakhun Final ka la long hapdeng ka Pdengshnong pyrshah ïa ka Block-1 kiba hapoh ka jingpeit jong ka dorbar shnong Mawkynroh Umshing.
Ka jingïakhun Final ha kane ka sngi ka la long kaba itynnad bad kaba ïakhaid bha, hynrei ha kaba kut, ka Pdengshnong ka la khur jingjop da kaba pynliem noh ïa ka Block-1 da 3-2 kol.
Ha kane ka sngi ka la don ruh ka jingïalehkai Final jong ki khynnah kynthei bad kumjuh ruh jong ki hep kiba rit kaba la pynphuh pynphieng ïa kane ka Final. Kane kan dei ka lympung kaba lai ba la pynlong da ka Seng Samla Mawkynroh Umshing, kata hadien ba ka la dep ban pynlong arsien ïa kane ka lympung ha ki snem kiba la leit noh.
Ha kane ka sngi pyn hap pyrda ïa kane ka lympung la ïadon lang ki nongïalam shnong bad dkhot ka Executive Committee ka Dorbar Mawkynroh Umshing, kiba la shimti ruh ha ka ban pynsam ïa ki khusnam kiba long da ki medal, trophy bad ka song pisa sha ki nongjop bad ruh kiba shah rem ha ka Final.
