Dhaka, Nailar:
Ka Bangladesh ha ka Sngi U Blei ka la plie biang ia baroh ki skul bad jaka pule, kynthup ia ki skulbah, ki skul heh bad ki kolej, ha kylleng ka ri hadien ba la khang khyrdep palat kumba shibnai namar ka jingleh donbor ba ki paidbah kim lah shuh ban shah bad kaba la wanrah ia ki jingiakhih paidbah ba la lam khmat da ki samla pule katei ka ri, haduh ba ka Myntri Rangbahduh ka Bangladesh- ka Sheikh Hasina ka la hap ban ieh noh ia ka shuki nongialam ha katei ka ri bad leit phet rieh noh sha India katba ka jinglong- jingman ha Bangladesh ka dang thnem.
Namar la ong ba baroh ki skul bad jaka pule kiba don ha kylleng jong ka ri Bangladesh ki la khang khyrdep kynsan- kynsan ha ka 17 tarik u Naitung kum shi bynta ban ïada ia ki samla bad ki khynnah pule na ki jingma kiba ap ia ki na kitei ki jingiakhih paidbah ha kylleng ka ri.
Kumjuh ruh la ong ba ka tnat pule puthi ha ka Sngi Saitjaiñ ka la pynmih ia ka jingbthah ban plie biang noh ia ki jaka pule kiba hap hapoh ka jingpeit jongka. Kumta, la ong ba baroh ki jaka pule ha ka Sngi U Blei ki la plie bad treikam biang kumba ju long hadien kumba shi bnai ba la khang noh ia ki namar kitei ki jingkulmar.
Katkum khubor na ki tnat pathai khubor jong ka Bangladesh na ka nongbah Dhaka, la pynmih ia ka jingpynbna ba la bthah ïa baroh ki bor pynïaid jong ki jaka pule bapher hapoh ka ri, ba kin shim ïa ki sienjam ba donkam ban bteng biang noh ïa ka pule- puthi naduh ka 18 tarik u Nailar hadien ka jingbthah jong u Chief Adviser Muhammad Yunus.
Kumta, la ong ba ha katei ka step Sngi U Blei, la ïohi ïa ki khynnah skul bad ki khynnah pule baroh kiba la leit ban bteng biang ia ka jingpule jongki kumba ju long baroh shi katta.
Bad la ong ba bun ki jaka jong ka nongbah Dhaka ki la sakhi biang ruh ia ka jingkhapngiah kali kaba jur bha namar ka jingplie biang ia ki jaka pule ha katei ka sngi.
