Bertina Lyngdoh
Ka imlang sahlang ka bakhuid ba suda, ka long ka imlang sahlang ka ba ai ne pynioh bynta lem ïa man uwei pa uwei u ba long lem u jingthaw ba im u Blei. Ka jingioh bynta lem kam loong tang i’u ba biang hynrei wat i’u bym biang, u barit ne ba tlot ruh. La’n shu kren noh, baroh u briew uba duna suda, bad dei namar kane baroh u dei ban long uba ioh bynta lem ha ka imlang sahlang. Ka imlang sahlang kaba khuid, ba sngewthuh, ka ju ai bynta lem katlah katiai ïa ki para mynsiem ba im lem jong ki. Ka imlang sahlang kaba khuid, kam ju i beiñ ne peitpoh khamtam ha ka ban ai bynta lem ïa uba kham hapoh ïaki.
Kumta, shisien bala wan longbriew, donkam ruh ban ioh bynta lem ha baroh ki liang. Ka pyrthei kyrduh kam kam ei tang ïa uba biang hynrei khamtam lei ïa ki bym biang. Ka jingioh bynta lem kam dei ban long shiliang shiliangg, hynrei katba lah hap ban pynïaryngkatlang. Lada ngi dei ki briew kiba tip i’u Blei, dei ban long ruh kiba tip i’u briew khamtam ïaka duh ka dang ka jingduna jong ki. Lada uba biang u donkam ban bam ban im, kumjuh ruh uba duna u donkam ban bam ban im. Namarkane keiñ, um banse ban mih nala ïing ba donbynta lem ha ka kamai ka kajih lane ka inclusive employment kumba ong haka ktien nongwei. Sngewsih pat ban pynpaw, ba ha ka imlang sahlang jong ngi, dang don kiba leh kiar haba leit pan jingkyrshan lem khamtam uba duna. Ka jingmih jongki ban ioh bynta lem ha ka kamai ka kajih kam dei ba ki pynbor ïaphi ban ïarap ïaki, hynrei ka shong haphi katno bad da kumno phi lah ban kyrshan lem ïa ka ioh ka kot jong ki. Nalor kane, sa kawei pat kaba tam ka long ka jingpeit jong phi ïaki ruh ka ktien ka thylliej. Kynmaw ba barabor shuwa ban leh ïa kano kano ka kam, U tei uba nalor u lah da dep tip lypa. Kiar na ka thok haba phim lah shisha ban kyrshan bad ïarap lem ïaki. Kum ka Nuksa, Ka shiphew arphew sanphew jongphi ka long kaba shongdor bha lada phi kyrshan da ka jingkhuid mynsiem.
Namarkata, ïa kyrshanlang khamtam ban ioh ka bam ka dih, ruh ka koit ka khiah. I barit eh iba phi kyrshan long keiñ i jingkyrkhu bakhraw na sha ka kti ka mon u Kpa ba halor. Kino kino ki kam kiba phi leh da ka jingkhuid mynsiem ka jingsiew kylliang ba bha ka wan na u kynrad. To long kita kiba don ryngkatlang khamtam ha ka jingkyrshan lang ïa ka kamai ka kajih jong ki. Khublei shibun khublei ïa kiba don ka mynsiem kyrshan lem.
