Washington, Nailar:
Ka United States ha ka Sngi Nyngkong ka la pynbna ba ka la mynjur ban die sha ka South Korea haduh 36 tylli ki liengsuiñ thma ‘AH-64E Apache’ bad kiwei de ki tiar ba ïadei bad kane, kynthup ïa ki ‘namding bad kiwei- kiwei.
Namar la ong ba ka jingthmu ban die ia kitei ki tiar sha ka South Korea, kan pynbha ïa ka jinglah jong ka Republic of Korea ban tehlakam ïa ki jingma kiba ap ia ka ha kane ka por bad kumjuh ruh ki ban sa wan hadien- habud, da kaba shaniah skhem ruh ba kitei ki tiar kiba ka South Korea ka ioh na ka US ha kane ka por, kin lah ban tehlakam ia kitei k jingeh kiba katei ka ri kan iakynduh nangne shakhmat, khamtam haba iadei bad ka jingleh donbor jong ka North Korea, kaba ju pyni bor bad byrngem na ka por- sha ka por ban thombor pyrshah ia ka South Korea tang shu bakla ne iathud eiei bad katei ka ri.
Kumta, la ong ba katei ka jingphah jong ka US ia kitei ki tiar, kan long ban pyntikna ia ka bor bad ka jingshngaiñ jong ka South Korea wat hapdeng ki jingma kiba ap ia ka ha kine ki sngi namar ka jingkhlaiñ pynher ‘namding jong ka North Korea bad ym lah tip ruh ioh ha kano- kano ka por ba katei ka ri kan leit hiar thma ne thombor ia ka South Korea kumba kiwei pat ki ri ki la leh ia kito ki ri kiba rit.
Kumjuh ruh ka tnat kam bar ri jong ka US ka la pyntikna ia ka jinglah ban die ia ki helicopter sha South Korea, bad ka DSCA ha ka Sngi Nyngkong ka la ai ia ka jingpynbna kaba donkam sha ka Congress, kaba dang donkam ban soi ia katei ka jingkhaii.
Katei ka jingpynbna ka la mih ruh ha kajuh ka sngi ba ka US bad ka South Korea ki sdang ïa ka jing pynkilan ia ki tnat shipai jong kitei ki arliang ri kaba ki ju iatrei lang man la u snem, hynrei ha kane ka sien la ong ba ka US ka la rai ban pyntbit bad pyn kilan noh ia kitei ki tnat shipai ka US bad South Korea da ki rukom kiba thymmai khnang ba yn lah ban tehlakam ïa ka North Korea kaba don ïa ki tiar nuclear lada kan thombor ia ka US ne South Korea ha kano- kano ka por bym lah ban tip.
