Shillong, Nailar 20
U kapten ka Germany u Ilkay Gundogan u la pynbna ba un shongthait noh na ka kam ïalehkai phutbol bar ri hadien ba u la mihkhmat ïa la ka jong ka ri ha ka Euro 2024.
“Hadien katto katne taïew jong ka jingpyrkhat, nga la poi sha ka jingkut jingmut ba ka la dei ka por ban pynkut noh ïa ka jingïalehkai jong nga ha ka kynhun ïalehkai ka ri,” la pynpaw u Gundogan ha ka kyrwoh jong ka German FA.
“Haba nga phai dien katno nga dap da ka jingsngew sarong kaba khraw ïa ki 82 tylli ki jingïalehkai ha ka pyrthei na ka bynta ka ri jong nga – ka jingkheiñ kaba ngam lah ban mutdur ha ka por ba nga la ïalehkai nyngkong eh na ka bynta ka kynhun ïalehkai senior ha u snem 2011.”
U Gundogan, u ban sa kynjoh sha ki 34 snem ha u Risaw, u la don ha ka kynhun jong ka Germany kaab la poi shaduh ka quarter final ha ka Euro 2024 shwa ban shah rem noh ha ka Spain ha ka extra time.
“Ka jingsngewtynnad jong nga ka long kaba shai ba ka burom kaba khraw ban ïoh ban ïalam ïa ka kynhun kum u kapten ha ka jingïalehkai European Championship ha la ïing jong ngi ha ka aïom lyiur ba la dep,” la bynrap utei u rangïalehkai shapdeng jong ka Barcelona.
U Gundogan, uba la jop phra tylli ki nam lahduh ha ka Premier League bad ka Champions League ha ki hynriew tylli ki samoi bad ka Manchester City shwa ba un leit sha Barcelona ha u snem ba la dep, u la kam ba u sngew ïa ka jingktah jong ka jingbunkam ha shwa ban sdang ka Euro 2024.
“Ka met ka jong nga ka la sngewthait bad kumjuh ruh ha ka khlieh jong nga, kaba la pynlong ïa nga ban pyrkhat. Bad ki jingïalehkai ha ka kyrdan klob bad ka ri kim shym la kham duna”, u la bynrap.
“Ngan ïai bteng biang ban long u nongkyrshan jong kane ka kynhun ïalehkai ka ri bad nga kyrmen shibun ba ka jingkiew kan lah ban bteng lang – bad nangta ym don ei ei ban khanglad ïa ngi ban long uwei na ki nongïalehkai ba kongsan ban ïoh ïa ka nam lahduh ha ka World Cup 2026.
“Ngi don ïa u coach uba tbit bha, ka kynhun kaba khlaiñ shisha bad ka mynsiem ïalehkai kaba khraw.”
U Gundogan u la mih madan nyngkong eh na ka bynta ka Germany pyrshah ïa ka Belgium ha u Risaw 2011, hynrei um shym la lah ban pynurlong ïa ka jingjop ha ka World Cup 2014 namar ka jingmynsaw ha ka tyrpeng. U la shah kyntait ruh ha ka Euro 2016 namar ka jingpang tyrpeng.
U la long u rangïalehkai phutbol ba nyngkong eh jong ka Germany uba dei na ka jaitbynriew Turkey ban long kapten jong ka kynhun ïalehkai jong ka ri bad u la paw ha ki saw tylli ki jingïalehkai kiba heh. U la long ruh u dkhot jong ka kynhun bym shym la pyndonkam ha ka Euro 2012.
“U Ilkay u dei u kapten uba pawnam bha, uba nga la kwah ban bteng ban ïatreilang” la pynpaw u coach ka Germany u Julian Nagelsmann.
“Ka jingkhang sha ka kynhun ïalehkai jong ka ri kam ju khang pura, hynrei ngi burom ïa ka rai jong u bad ngi kitbok kitrwiang ïa u na ka bynta ka lawei jong u, ha ka kam bad ha ka kam shimet.”
