Nairobi, Nailar:
Ki pulit jong ka Kenya, ki la pynlong ka jingthwet briew kaba jur ha ka Sngi Ba-ar hadien ba uwei u runar uba la don kti ha shibun bah ki kam pyniap briew kynthup ia 42 ngut ki kynthei kiba u la pynjot bad pyniap, u la phet krad na kawei ka patok ha Nairobi, ryngkat bad ki phew ngut kiwei pat ki nongshah set ha katei ka sngi.
U Collins Jumaisi, 33 snem ka rta, uba la pynbna da ki pulit kum u “vampire, psychopath”, u la shah kem ha u bnai ba la dep, hadien ka jinglap ba shyrkhei jong ki pulit ia ki met-iap kiba la shah ot ha ka jaka bret ñiut kaba don ha kawei na ki nongbah jong ka Kenya.
Kumta, ki pulit ki la pynlong da ka jingtohkit ba kyrkieh bad ka jingkhynra kaba jur kaba dang iaid haduh mynta, ban ioh kem biang ia kitei ki 13 ngut kiba la lait phet na katei ka patok.
Haba iakren bad ki nongthoh khubor ha katei ka sngi, ki pulit ki iathuh ba ki la lap ia katei ka jinglait phet ki koidi ha ka por ba ki pulit ki dang leit ban jngoh ia ki kamra patok ba set ia kitei ki koidi ha katei ka tnat, ha ka por kumba 5 baje mynstep ban leit ai bam ia kitei ki koidi kumba ju leh man la ka step.
