D. H. Kharkongor
Ka Sorkar khleh khawlang, ka Meghalaya Democratic Alliance 2.0, kaba hapoh ka jingïalam jong ka NPP, ïa kaba la khlieh da u Conrad K Sangma, ka la nguid sa ïa ki laingut ki MLA jong ka INC, kata, hadien ba ka la dep ban nguid tylli tyllan sha la kpoh, ïa ka HSPDP bad ka PDF, thik kumba nguid tylli u ‘lenlum ïa ka blang. Hap ban ïaroh ïa u Conrad naba tang ha ki khyndiat snem ka NPP, kaba dei ka seng saiñ pythei ka jong u lem bad ka ïing ka sem bad ka khyndan ka jong u, ka lah lah ban pynthame ïa kiba bun ki MLA / MDC kat ba kin wan ban pynïasnoh ïalade bad ka. Ki leh ruh kumta da kaba ki ïehnoh lyndet bad jyndat jyndat wat ïa la ki jong ki Seng saiñ pythei kiba la pynjop donburom ïa ki.
Kat kum ka ñia ka jutang ka jong kine ki Three Musketeers’ kiba dei pynban ki ‘langprad kper ne ki riewkyntiap seng ne ki riew klim seng ba ka long kaba sepei ban jop ïa kano kano ka ‘election’ lada ym ioh ban don ha ka liang synshar ne ka ‘Ruling lane lada kin hap ban shong baroh San Snem ha ka liang pyrshah ne ka ‘Opposition’. Ka long sepei ïa ki naba tang kum ki MLA jong ka liang pyrshah kin nym lah ban pynurlong ïa kata ka roi ka kiew (civil development) kaba kat kum ka jingdonkam jong ka ‘Constituency’ kaba ki mihkhmat.
Nud ban ong ba kata baroh ka dei tang ka ñiakhynnah kaba khem nongrim, kaba tang ban pynksan jubor ïala ka jong ka jingklimseng. Ka dei tang ka ñiakhynnah naba ka liang ‘Synshar’ kam dei bad kam don hok ban khanglad khanglynti ïa ki kam pynroi kiba dei hok ha ki ‘Assembly Constituency’ jong baroh ki MLA kiba don ha ka liang pyrshah.Ka liang synshar kam don hok bad kam dei, da leilei ruh em, ban leh kumta. Nud ban ong ba kat kum ka ritisynshar jong ka Ri India ka pyrla jong ka karoi ka kiew kam dei ban noh shiliang.
Kat kum ka ñia ka jutang ka jong kitei ki ‘Three Musketeers’, kiba dei ki nong-klim seng saiñ pythei, ba kane ka Sorkar MDA 2.0, lyngba kane ka jingleit pynïasnoh ka jong ki bad ka NPP, kan sa plie kyrpang noh ïa ka lad ka lynti kaba ïadei bad ki kam pynroi na ka bynta ki ‘Assembly Constituency’ ki jong ki. Kumta kat kum katei ka ñia pynthame ka jong kitei ba nangne sha khmat ka Nongstoiñ Assembly Constituency, ka Umsning Assembly Constituency bad ka Mawhati Assembly Constituency kin sa ioh noh ïa ki kam pynroi kiba pher ba pher kiba, baroh shi katta, kane ka Sorkar MDA 2.0 ne ka NPP ka set sbak. Kat kum ka ñia ka jutang ka jong kitei ki ‘Three Musketeers’ ba ka NPP, lyngba ka MDA -2, kan dang ïaikhang hi sbak ïa baroh ki kam pynroi kiba ïadei bad ki Assembly Constituency jong baroh ki MLA kiba don mynta ha ka liang pyrshah. Kat kum ka ñia ka jutang ka jong u Snewbhalang, uba dei u Symbud Myntri Rangbah jong ka MDA 2.0, ba ki Assembly Constituency kiba mihkhmat da ki dkhot ka MDA kin ioh kham bun ka bhah na ka bynta ka roi ka kiew ban ïa ki Assembly Constituency ba la mihkhmat da ki MLA jong ka liang pyrshah, katta, ki MLA bym dei ki dkhot jong ka MDA 2.0.
Ym lah namar kata khlem da sngew sammut ïa ka ñia khynnah ka jong u Sngiawbhalang Dhar lem bad kitei ki ‘Three Musketeers’. Ki ‘Three Musketeers’ kiba khlem ka nongrim kaba skhem kat ban long kiba kloi lan ban nguid biang jluk ïa la ka jong ka prie kaba ki dang shu dep ban khlei madan, myn ha kane ka ‘election’ kaba dang shu dep. Ki bym lehrain namar kata ban thok ban thak ne ban shukorpyllein pyllein ïa la u jong u paid. Ym lah pat ruh khlem da sngewsammut ïa ki paid nongthep ‘vote’ jong ki Assembly Constituency ki jong ki. Ki paid kiba shah kheiñ khyllung khynnah ha ki. Ki paid kiba lah da shah shukor noh shen shen hadien kaba ki shah pynthame. Ki paid kiba shen shen ki lah da shah pynlong pynban tang kum ki dieng byllan.
Nga ngeit kam long kaba bakla ban ong ba kane ka jingleit pynïasnoh ka jong kitei ki ‘Three Musketeers’ bad ka NPP ka dei beit thik ka jingkhwan myntoi shimet ka jong ki. Lah ban ong ba kawei naki daw bah ka dei ka jingthrang ka jong kiba kin ioh ban khyllie biang noh (recover) mar mar ïa baroh ka tyngka pliah ka jong ki, kaba ki la pynlut pynsep myn ha kane ka ‘election’ kaba dang shu dep. Kaba katno tam ban ioh biang ïa ka pisa pliah kaba ki hap ban pynlut ha kaba khlieh dor ïa ki ‘khlieh sniang’ ne ki ‘shijur ki kjatsniang’.Nalor kata kin hap ruh ban kyrkhu kyrpang, kum ka nongkylliang, ïa baroh kito kiba la ïarap bei tyngka ïa ki. Kaba ar ka dei ka kabu ba kin ioh ban lumspah na ka bynta ba kin khlieh dor biang sa ha u snem 2028. Kabalai ka dei ka jingpynthikna ba kin ioh ban mihkhmat hi noh dalade na ka NPP ha u 2028. Ynda kumta ba wat ka jinglut jingsep, kaba na la ka jong ka pla, ruh kan khamduna.
Kumta ym lah pat khlem da sngewsynnei ïa kiba lah don lypa, baroh shi katta ki snem, ha ka NPP. Kaba katno tam ïa kiba lah don baroh shikatta ïa ka jingthmu bad ïa ka jingkyrmen ba kin ioh ban mih madan ban ïa aireng ha u 2028, na ka NPP. ïa kum kita, lem bad ka kynhun kaba kyrpang ka jong ki, ba ka jingtrei shitrhem kaba baroh shikatta, kaba ha ryngkat ryngkat ka jingpynlut pynsep, kansa long lehnoh-ei.Ym artatien ba nangne sha khmat ka jingïathan kan sa sdang. Ki dak ki shin jong ka jingorpait ruh kin sa nang paw shynna. Ym artatien ba naduh mynta ka lahmihlypa ka jingkylli ïano ka NPP kansei madan, ban ïa aireng ha u 2028, naka Umsning Assembly Constituency, na ka Mawhati Assembly Constituency bad na ka Nongstoin Assembly Constituency. Ka juh ka jingkylli nga buh ïa ka Mawsynram Assembly Constituency. Shwa ban ïakutnoh to ïa kynmaw ba u Conrad u lah phla, ba baroh shikatta, u ju peit iap mat bha ïa kine ki ‘Three Musketeers’. Te mano phi thari ban suhkpoh suhsnier bad duh thiah duh dem lada wan pynïasoh NPP sa u Ronnie V Lyngdoh jong ka Mylliem?
