New Delhi, Nailar:
Da ki spah ngut ki samla pule na India kiba la dep pule ki la pynlong ïa ki jingïakhih pyrshah ïa ka polisi thymmai jong ka Sorkar Pdeng ha Canada kaba buh ïa ki ha ka jingma ban shah beh noh na katei ka ri.
Namar la ong ba shibun ki samla pule nabar ri, khamtam kito kiba na India, ki thrang ban leit sha katei ka ri North America da ka jingkyrmen ban tei ïa ka jingim kaba kham bha ha katei ka ri, naba la ong ba katei ka jingpynbna ïa ki jingkylla ha ka polisi haba iadei bad ka jingleit rung jong ki samla nabar ri, ka la buh jingsyier ia ka lawei jong palat 70,000 ngut ki samla pule kiba dang ap khmih lynti ia ka lawei ba phyrnai da ka jingkyrmen bad jingshaniah skhem jongki ha ka pule- puthi na katei ka ri.
Kumta, ha ki khyndiat sngi ba la leit, kitei ki samla pule na India ki la shong shi jaka hakhmat ka iing dorbar thaw aiñ ka nongbah Prince Edward Island jong ka ri Canada, da kaba pyrshah jur ïa kitei ki rai ba kyndit haba iadei bad ka jingpynkylla ia ki policyha kane ka sien bad la ong ba kane kan sa ktah jur ia ki samla pule na India kiba thrang ban pyndep ia ka pule- puthi na katei ka ri.
Kitei ki policy thymmai jong katei ka ri, ki long ban pynduna noh ia ka jingdon jong ki nongshong shnong ba pura da 25% bad kumjuh ruh ban khanglad ia ka jingbun palat ki samla pule ba nabar kiba leit shong ha katei ka ri.
Kane ka jingkylla ka la long ruh ha kum kane ka por ba ba ka ri Canada ka la ïohi ïa ka jingkiew stet jong ka jingbun briew ha kine ki khyndiat snem ba la dep. Kumba 97% na ka jingkiew jong ki briew ha Canada ha u snem ba la dep, ka dei namar ka jingwan buhai shnong, katkum ka jingbuh jingkheiñ jong ka sorkar pdeng.
Namar la ong ba ki nongmihkhmat na ka kynhun ïasaid ki samla pule ka Naujawan Support Network, ki la maham lypa ba ki samla ba la dep pule ki don jingma ba ki lah ban shah beh noh ynda ki kot- ki sla jongki, ki la kut noh ha kaba kut jong une u snem.
