Tehran, Nailar:
Ha ka sien ba nyngkong, la ong ba ka Iran ka la thung ia katei ka longkmie kum ka khmat ki paidbah jong ka sorkar Iran kaba thymmai, ha kaba ka Fatemeh Mohajerani kan shah thung kum ka nongaiktien jong ka sorkar ha Masoud Pezeshkian.
Ïa kane ka jingthungkam la leh da u President Pezeshkian ha ka jingïalang jong ka kynhun myntri kaba la long ha ka Sngi Balang.
Ka Mohajerani, ka la don 54 snem ka rta, bad ka long ruh ka Doctor jong ka Business Administration na Edinburgh bad mynshwa ka la bat teng ia ka kyrdan kum ka nongialam jong ka Technical & Vocational Training University ha Shariati (na bynta ki kynthei).
Ka Mohajerani ka la shah jied kum ka nongialam jong ka Centre for Brilliant Talent da u Myntri ka tnad pule puthi ha katei ka por- u Seyyed Mohammad Bat’hai ha u snem 2017 bad ka la bat ïa kiwei de ki kam ha ka tnad pule puthi ruh kumjuh.
Kumta, la ong ba kane ka dei ka jingthung kam kaba nyngkong eh ia ka kynthei ha ka kyrdan kaba heh ha katei ka ri, kaba ki kynthei ki ju shah kheiñ poh lane kim da iohlad ban iadon bynta ha ki kam paidbah kumba long ki shynrang lane ki rangbah.
Namar kumba ju iohi hi ha kine ki por ba la leit, ba ka Iran ka la knieh lut ia ka hok jong ki kynthei bad ki longkmie bad ka ju pyngnat kyndon wat ia kito ki kynthei ki bym bud ia ka rukom im jong kitei ki jaitbynriew kynthup naduh ka jingkup ia ka tapmoh khlieh haba ki mih sha ki jaka paidbah ne shabar ka iing.
