Kyiv, Naitung:
Ka jingkhot ïing kaba man ka por ka la kylla long ka jingap kaba jynjar na ka bynta kawei ka longïing ha Uttar Pradesh. U Ram Chandra Dubey, uba dang 22 snem ka rta, uba na Prayagraj, ula jah rngai mynta la 6 sngi lynter, hadien ba ka lieng khaii, kaba u trei, ka la shah thombor ha ki drone hajan ka kad lieng jong ka Odesa jong ka Ukraine.
Wat hapdeng ka jingpyrshang ban pynlait im bad ka jingkyrpad bunsien sha ki bor pyniaid, hynrei ym shym la lap ksai ne iohi dak eiei shuh shaphang utei u samla naduh ka jingshah thombor ha ka 25 tarik u Naitung.
U Ram Chandra, uba dei u nongshong shnong jong ka shnong Nibi Kala ha Jhunsi, Prayagraj, u dei u khun ba rit jong u shipai ba la shongthait, u Ramesh Chandra Dubey. U la rung ha ka kynhun shipai duriaw khaii dang shen bad u don tang ha ka kam kaba ar jong u shabar ri, hadien ba u la leit trei ha u bnai Naiwieng jong u snem ba la dep.
Ki bahaïing jong u, ki ïathuh ba u la ioh ban ïakren khatduh bad ka kmie jong u, ka Kalpana Dubey, ha ka miet jong ka 24 tarik u Naitung. Ha ka jingiakren, u la iathuh ïa ka ba ka lieng jong u ka la mih na Ukraine.
Hynrei tang hapoh 24 kynta hadien katei ka jingiakren phone jongki, la ong ba katei ka jhad ka la shah thombor bad kem ding noh ha ka jingbthei jong ki drone hajan Odesa katba ka dang thmu ban leit sangeh noh ha katei ka Kad Lieng jong ka Odesa.
Katkum ka jingtip ba la sam da ka kompeni kaba dei trai jong katei ka jhad, ki don 8 ngut ki briew kiba shong ha katei ka jhad khaïi, kynthup ïa 4 ngut ki nongtrei jong ka jhad kiba dei ki nong India.
Katba ka jingshah thombor ka nong iai bteng, kitei ki nong India ki la ngam jyllop lem bat katei ka jhad ha katei ka duriaw katba ki dang pyrshang ban phet krad bad ban pyllait im ïalade shimet- shimet. Hadei katei ka jingjia, ki kynhun iarap jong ka Ukraine ki la leit poi mar-mar sha katei ka bynta jong ka duriaw ban p yllait im ïa kitei kiba dang lah ban tan noh kloi, ha kaba, ki la ioh ban pyllait im tang ïa ki 2 ngut napdeng kitei ki nongtrei bad ki dkhot jong katei ka jhad baroh.
Hynrei u Ram Chandra Dubey bad uwei pat u nong India ki dang jah rngai hi tad haduh mynta.
