Shillong, Nailar 29
Ka lympung ïalehkai Third Division Football League 2024 ba la pynïaid da ka Shillong Sports Association ka la nangjam shaphrang ha kaba ka Lawmali SC ka la khur ïa ka jingjop hadien ba ka la lah ban pynliem noh ïa ka Gorkha Association da 4-1 kol ha ka sngi Palei ha madan Polo.
U Playerson Nongkseh u la ïoh ban thep marwei haduh ar kol, katba ïa kiwei pat la pynbud da u Richmon Buam bad u Dameshwa Malngiang na ka bynta ban khur ïa ki lai point.
Ha kane ka jingïakhun ka Lawmali ka la lah ban ïalehkai bha naduh kaba sdang ha kaba ka ïoh ban pynkhih jar nyngkong eh lyngba u Playerson ha ka minit kaba 20. Hadien ar minit kane ka kynhun ka la pynbud biang ïa ka kol kaba ar lyngba u Richmon Buam ha ka minit kaba 22.
Hadien shiteng kynta ka Lawmali ka la ïoh ban thep biang ïa ka kol kaba lai lyngba u Dameshwa ha ka minit kaba 34 na ka bynta ban tam da 3-0 kol. Watla ka Gorkha ka la shah thep haduh lai kol, hynrei ka la ïakhun tyngeh bad ka la ïoh ban pynphai kylla lyngba u Rishikesh Gautam ha ka minit kab 43.
Hashwa ban wai u Playerson u la thep biang ïa ka kol kaba ar ka jong u ha ka minit kaba 54 na ka bynta ban pynlong syndon ïa ka Lawmali ba kan khur ïa ka jingjop.
Haba phai sha kawei pat ka jingïakhun kaba ar hapdeng ka Sanmer SC bad ka Rynjah SC ki la ïasam mar shi point hadien ba ki la ïakhaid mar 1-1 kol. Ka Rynjah ka la ïoh ban pynkhih jar nyngkong eh lyngba u Banshailang Khyriem ha ka minit kaba 12, hynrei hashwa ban wai ka Sanmer ka la lah ban pynphai kylla lyngba u Mebankyrshan Khongsam ha ka minit kaba 88 na ka bynta ban ïakhaid mar shi kol.
