Srinagar, Nailur:
U Vice President jong ka National Conference ha Jammu & Kashmir u Omar Abdullah ha ki khyndiat sngi ba la leit, u la pynpaw ïa kaei kaba la jia ha ka jingïakren na ka bynta ban ïatreilang ha ka ilekshon bad ka seng Congress na ka bynta ka ilekshon Assembly. Haba ai jingkren ha ka jingïalang kaba la long ha ka shlem treikam jong ka seng ha Srinagar, u Myntri Rangbah barim ka jylla u la ong ba kane ka ilekshon ka dei ka jingïakhun na ka bynta ka J&K baroh kawei.
“Lada ngi hap ban weng noh ïa ki jingbakla kiba la leh ïa ngi, kam ai jingmyntoi tang ïa ngi, hynrei ïa uwei pa uwei u nongshong shnong jong ka Jammu & Kashmir. Ngi ïakhunlang ïa kane ka thma na ka bynta ka Jammu & Kashmir,” u la ong.
“Dei na kata ka daw ba ngi ïasnohktilang bad ka seng Congress, wat la kam dei ka rai kaba suk ïa ngi, (namar) ngi la hap ban len lade na ka bynta kito ki shuki ha kaba ngi tip tang ka NC kaba lah ban ai ïa ka jingïakhun kaba tyngeh,” la ïathuh ki lad phah khubor kumba la kren da u Abdullah.
Haba pynpaw ïa ka jingdonkam jong ka jingïatreilang hapdeng ka Congress bad NC pyrshah ïa ka BJP, une u nongïalam uba la 54 snem ka rta u la ong,”Ha kiba bun ki konstitwensi, kum ha ki jaka them jong ka Jammu, Poonch, bad Rajouri, ka Congress bad ngi ngi lah ban ïakhun lang ïa kita da kajuh ka bor, dei na kata ka daw ba ngi la ai ïa ka Congress katto katne ki shuki hangne na ka bhah jong ka NC.”
Kat kum ka rukom ïasam shuki hapdeng kine ki ar tylli ki seng, ka National Conference kan ïakhun ha ki 51 tylli ki shuki katba ka Congress kan ïakhun ha ki 32. San tylli ki jaka jong ka Union territory kin sakhi ïa ka “jingïakhun paralok”.
U Omar Abdullah u ïakhun na Ganderbal, ka konstitwensi kaba u mihkhmat naduh u snem 2008 haduh u snem 2014 ha ka por ba u dang long Myntri Rangbah jong ka sorkar synrop ka NC-Congress.
Ka ilekshon sha ka ïingdorbar thawaiñ ka jylla Jammu & Kashmir kan long ha ki lai bynta ha ka 18 tarik, Nailur, 25 tarik, Risaw bad ka 1 tarik, Risaw bad ka jingñiew ïa ki vote kan long ha ka 4 tarik, Risaw.
